Гал унтраах техникийн олон төрөлт спортын бүсийн аварга шалгаруулах тэмцээн Архангай, Увс, Говьсүмбэр, Сүхбаатар аймагт амжилттай зохион байгуулагдаж, бүс бүрийн шилдэг баг тамирчид тодорлоо.

Зүүн бүсийн тэмцээнд Хэнтий аймгийн Онцгой байдлын газрын баг тамирчид түрүүлж, Өмнөд бүсийн аваргаар Дундговь аймгийн Онцгой байдлын газар шалгарсан бол Баруун бүсийг Увс аймгийн Онцгой байдлын газар тэргүүлж, Хойд бүсийн ялагчаар Дархан-Уул аймгийн баг тодорсон байна.

Хоёр жил тутамд зохион байгуулагддаг энэхүү тэмцээн нь алба хаагчдын бие бялдар, авхаалж самбааг шалгах, гал түймэр, гамшгийн нөхцөл байдалд хурдан шуурхай, багийн зохион байгуулалттайгаар ажиллах ур чадварыг хөгжүүлэх зорилготой юм. Тэмцээнд оролцогчид довтолгооны шат, саадтай 100 метрийн гүйлт, 4х100 метрийн буухиа уралдаан, байлдааны тархалт гэсэн дөрвөн төрлөөр хурд хүч, авхаалж самбаагаа сорьдог байна.

Орон нутгийн онцгой байдлын албадын чадавхыг бэхжүүлэх, харилцан туршлага солилцох, эв нэгдлийг хөгжүүлэх ач холбогдолтой энэхүү тэмцээний үр дүнд бүс бүрт шилдэг баг тамирчид тодорч, дараагийн түвшний тэмцээнд оролцох эрхээ баталгаажуулжээ.