Архангай аймгийн тээврийн байгууллагууд 2025 оны эхний дөрвөн сарын байдлаар нийт 8.7 мянган зорчигч тээвэрлэж, 15.6 мянган тонн ачаа зөөвөрлөн, 316.9 сая төгрөгийн орлого олжээ. Энэ нь тээврийн салбарт зорчигчдын урсгал буурч, харин ачаа тээвэрлэлтийн хэмжээ эрс нэмэгдсэн үзүүлэлттэй гарсан байна.

Аймгийн Статистикийн хэлтсийн мэдээлснээр зорчигч тээвэрлэлтийн хэмжээ өмнөх оны мөн үетэй харьцуулахад 20.2-21.8 хувиар буурсан бол ачаа тээвэр 81.4 хувиар өссөн байна. Харин ачаа эргэлт 72.4 хувиар буурсан нь тээвэрлэсэн ачааны дийлэнх нь ойрын зайнд тээвэрлэгдсэнтэй холбоотой хэмээн тайлбарлаж байна.

Шуудан, холбооны салбарт энэ хугацаанд 18.2 сая төгрөгийн орлого бүрдүүлсэн бөгөөд үүний:

• 65.7 хувь нь бичиг, захиа, боодлын үйлчилгээний орлого,

• 7.2 хувь нь илгээмж болон худалдааны үйлчилгээний орлого,

• 8.6 хувь нь илгээлтийн орлого,

• 18.5 хувь нь марк, гардуулалт, үнэт цаас, хүргэлтийн үйлчилгээний орлогоос бүрджээ.

Эдгээр тоон үзүүлэлтүүд нь аймгийн тээвэр, шуудангийн бүтэц, чиг хандлагад өөрчлөлт орж буйг харуулж байна. Зорчигч тээврийн бууралт нь хөдөө орон нутгийн хүн амын хөдөлгөөн, хэрэгцээ өөрчлөгдөж буйтай холбоотой бол, ачаа тээврийн өсөлт нь бараа бүтээгдэхүүний нийлүүлэлт, дотоод худалдааны идэвхжил нэмэгдсэнтэй уялдаж байна.

Эх сурвалж: Архангай аймгийн Статистикийн хэлтэс