2025 онд нийслэлийн хэмжээнд нийт 16 байршилд явган хүний замыг байгалийн чулуун хавтангаар шинэчлэх ажлыг үе шаттайгаар хэрэгжүүлж байгаа бөгөөд эдгээрийн нэг болох Төв шуудангийн уулзвараас Сүхбаатарын талбайг тойрсон 5000 м² талбайн эхний хэсгийн ажлыг дуусгаж байна.
Нийслэлийн Улаанбаатар хотын Захирагчийн ажлын албаны Тохижилт, хог хаягдлын удирдлагын газрын дарга Г.Билгүүн энэ талаар мэдээлэхдээ “Ажил гүйцэтгэлийг хэсэгчлэн зохион байгуулж байгаа тул явган зорчигчдын хөдөлгөөнд аль болох саад учруулахгүй байх зарчмыг баримталж байна. Тухайлбал, Төв шуудангийн уулзвараас Хөрөнгийн бирж хүртэлх хэсгийн ажлыг дууссаны дараа дараагийн хэсгийн ажил эхэлнэ” хэмээн тайлбарлалаа.
Шинэчлэлийн хүрээнд зөвхөн явган замын өнгө үзэмжийг сайжруулахаас гадна кабель, инженерийн шугам сүлжээ, борооны ус зайлуулах шугамыг шинэчилж, зохион байгуулалтын ажлуудыг зэрэгцүүлэн хийж буйг тэрбээр онцолсон юм.
Уг явган замыг 4 см хүртэлх зузаантай байгалийн боржин чулуун хавтангаар хийж байгаа бөгөөд энэхүү материалыг үндэсний үйлдвэрлэгч болох Чулуу үйлдвэрлэгчдийн холбооны 14 компанийн бүтээгдэхүүн болон БНХАУ-аас нийлүүлж байна. Энэхүү шинэчлэл нь нийслэлийн төв гудамж, талбайн өнгө төрхийг сайжруулахын зэрэгцээ олон жилийн эдэлгээ даах чанартай, бат бөх бүтэцтэй замаар иргэд ая тухтай зорчих нөхцөлийг бүрдүүлэх юм.
Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс
