Улаанбаатар хотын авто замын түгжрэлийг бууруулах зорилгоор хэрэгжүүлж буй дөрвөн байршил бүхий нүхэн гарцын бүтээн байгуулалтын ажил үргэлжилж байна. Үүнд Таван шарын төмөр замын гарам, Геологийн төв лабораторийн уулзвар, “Хермес” төвийн төмөр замын зоорь, Нарантуул захын дөрвөн замын уулзварын төслүүд багтаж байгаа бөгөөд эдгээрээс хамгийн түрүүнд Таван шарын нүхэн гарц ашиглалтад орсон юм.
Тус гарцын авто замын зорчих хэсгийг 2024 оны есдүгээр сард нээсэн бөгөөд өнөөдрийн байдлаар нийт ажлын гүйцэтгэл 85 хувьтай үргэлжилж байна. Үлдээд буй 15 хувийг дагалдах тохижилтын ажил эзэлж байгаа бөгөөд уг ажлыг хуваарийн дагуу нэг сарын хугацаанд багтаан дуусгахаар гүйцэтгэгч байгууллага ажиллаж эхлээд байна.
Нэгдсэн төслийн удирдлагын газрын авто зам, замын байгууламжийн менежер А.Ербол байршил дээр очиж ажиллах үеэрээ “Тохижилтын ажлын хүрээнд дөрвөн хэсэгт ногоон байгууламж байгуулж, замын тэмдэг, тэмдэглэгээ, орчны арчилгааны ажлыг бүрэн дуусган хүлээлгэж өгнө” гэж мэдэгдэв.
Таван шарын нүхэн гарц нь төмөр замын доогуур тавигдсан 169 метрийн урттай, 5.8 метр өндөр, 10.2 метр өргөнтэй хос туннел бүхий дэд бүтэц бөгөөд иж бүрэн ус зайлуулах системтэй. Энэхүү бүтээн байгуулалт нь хотын түүхэнд анх удаа хэрэгжиж буй инженерийн иж бүрэн шийдэл бүхий гарц гэдгээрээ онцлогтой юм.
Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс
