Нийслэлийн прокурорын газар Цагдаагийн ерөнхий газрын Хар тамхитай тэмцэх газартай хамтран 2025 оны хоёрдугаар сарын 17-ноос дөрөвдүгээр сарын 17-ныг хүртэлх хугацаанд “Мансууруулах эмийн эргэлтэд хяналт тавих” сэдэвт нэгдсэн шалгалтыг зохион байгуулжээ.
Шалгалтын хүрээнд эмнэлэг, эм ханган нийлүүлэх байгууллага, эмийн сангуудын мансууруулах болон сэтгэцэд нөлөөт эмийн орлого, зарцуулалт, хадгалалт, борлуулалтын байдалд нарийвчилсан хяналт хийсэн байна.
Нийслэлийн прокурорын газрын хяналтын прокурор Г.Янжиндуламын мэдээлснээр:
-
Улаанбаатар хотод үйл ажиллагаа явуулдаг 17 байгууллагад шалгалт хийсэн
-
Шалгалтаар 10 гэмт хэргийн шинжтэй үйлдэл илэрсэн
-
Мөн мансуурах зорилгоор сэтгэцэд нөлөөт эмийг хууль бусаар олж хэрэглэсэн, жоргүйгээр бусдад борлуулсан 4 зөрчлийн шинжтэй үйлдлийг илрүүлж, мөрдөн шалгах ажиллагаа эхлүүлээд байна
Илэрсэн зөрчлүүдийн үндсэн дээр Нийслэлийн прокурорын газраас гэмт хэргийн шалтгаан, нөхцөлийг арилгуулах зорилгоор гурван байгууллагад прокурорын мэдэгдэл бичиж хүргүүлсэн байна.
Энэхүү шалгалт нь эмийн хууль бус эргэлтийг бууруулах, сөрөг үр дагавраас урьдчилан сэргийлэхэд чиглэсэн чухал алхам боллоо.
Эх сурвалж: Нийслэлийн прокурорын газар
