Гэр бүл, хөдөлмөр, нийгмийн хамгааллын яамнаас боловсруулсан Нийгмийн халамжийн тухай хуулийн шинэчилсэн найруулгын төсөл-ийг хөгжлийн бэрхшээлтэй иргэд, ахмад настан зэрэг эрх нь хөндөгдөх нийгмийн бүлгийн төлөөлөл, төрийн бус байгууллагуудтай хэлэлцэн, санал солилцлоо.

Шинэчилсэн төсөл нь халамжийг илүү оновчтой, чиглэлтэй хүргэх зорилготой бөгөөд дараах үндсэн чиглэлүүдийг тусгажээ:

• Халамжийг зорилтот бүлэгт төвлөрүүлж, хөтөлбөрийн нэр төрөл, хамрах хүрээг оновчтой болгож, зарим давхардсан хөтөлбөрийг нэгтгэх

• Бэлэн мөнгөний бус үйлчилгээ нэвтрүүлж, иргэн өөрийгөө хөгжүүлэх, чадавхжуулах, зан хандлагаа өөрчлөх, бие даан амьдрах чадвар эзэмшихэд дэмжлэг үзүүлэх

• Нийгмийн халамжийн тэтгэмж, тусламжийг хугацаа, хязгаартай болгож, хөдөлмөр эрхлэлтийг дэмжих

• Кейс менежментэд суурилсан хэрэгцээнд нийцсэн үйлчилгээ үзүүлж, тусламжийг илүү үр дүнтэй болгох

Эдгээр өөрчлөлт нь халамжийн тогтолцоог шинэ шатанд гаргах, хэт хамааралтай байдлыг бууруулж, иргэнийг идэвхтэй оролцогч, бүтээмжтэй гишүүн болгоход чиглэж буйг яамнаас онцолсон байна.

Эх сурвалж: Гэр бүл, хөдөлмөр, нийгмийн хамгааллын яам