Сайншанд сумын Засаг дарга Ч.Түвшинтөр захирамж гаргаж, 2025 оны зургадугаар сарын 1-нээс эхлэн сумын хэмжээнд электрон тамхи болон түүний дагалдах хэрэгслийг худалдахыг бүрэн хориглолоо. Энэхүү шийдвэр нь өсвөр насныхныг тамхидалт, никотинд донтохоос сэргийлэх, эрүүл, аюулгүй орчныг бүрдүүлэх зорилготой бөгөөд орон нутгийн хэмжээнд энэ төрлийн анхны хатуу арга хэмжээ болж байна.

Захирамж гаргахаас өмнө сумын ЗДТГ-аас электрон тамхи худалдаалж буй аж ахуйн нэгжүүд, иргэдтэй уулзалт хийж, тэдний санал бодлыг сонссон байна. Ийнхүү талууд харилцан ойлголцолд хүрч, нийгмийн эрүүл мэндийг дэмжсэн шийдвэрийг нэгдмэл байдлаар гаргажээ.

Захирамжид өсвөр насныхныг электрон тамхи хэрэглэхээс урьдчилан сэргийлэх, хэрэглээг бууруулах, хүүхэд залуусыг эрүүл өсгөх нөхцөлийг хангах, хэрэглэгчийн аюулгүй байдал, хууль тогтоомжийн хэрэгжилтийг хангаж ажиллах үүргийг холбогдох албаныханд даалгасан байна.

Электрон тамхи нь гаднаасаа аюул багатай мэт харагддаг ч бодит байдал дээр нэг ширхэг төхөөрөмжид 20 янжуур тамхитай тэнцэх хэмжээний никотин агуулагддаг бөгөөд энэ нь хурдан хугацаанд донтуулах өндөр эрсдэлтэй. Дэлхийн эрүүл мэндийн байгууллага болон Монгол Улсын Эрүүл мэндийн яам ч энэ аюулыг хүлээн зөвшөөрч, олон нийтэд анхааруулж буй.

Сайншанд сум нь Улаанбаатар хотоос 450 км алслагдсан бөгөөд орон нутгийн 30 мянга орчим хүн амтай, төмөр болон авто замын гол зангилаа хот юм. Орон нутгийн захиргаанаас авсан энэхүү шийдвэр нь бусад сум, аймгуудад жишиг болж, тамхигүй орчныг бүрдүүлэхэд чухал нөлөө үзүүлнэ гэж үзэж байна.