Урин дулааны улирал ирж, төв суурингуудаас орон нутгийг чиглэсэн хөдөлгөөн эрс нэмэгдэж байгаа энэ үед Тээврийн цагдаагийн албаас “Орон нутгийн зам, хөдөлгөөний соёл–2025” нэгдсэн арга хэмжээг улсын хэмжээнд эхлүүллээ. Энэхүү хяналт, нөлөөллийн арга хэмжээ зургаа, долоо, наймдугаар сарын турш үргэлжлэх бөгөөд “Шугаман эргүүл, цагийн менежмент” уриан дор хэрэгжих юм.

Хөдөлгөөний аюулгүй байдлыг хангах, зам тээврийн ослоос урьдчилан сэргийлэх, жолооч нарын сахилга хариуцлагыг дээшлүүлэх зорилго бүхий уг ажлын хүрээнд дараах чиглэлээр хяналт, нөлөөллийн ажил хийгдэнэ:

• Авто замын эвдрэл, гэмтлийг шуурхай засварлуулах

• Хөдөлгөөн зохицуулах техник хэрэгслийг бүрэн бүтэн байлгах

• Иргэдэд замын хөдөлгөөний дүрэм, хууль эрх зүйн мэдлэгийг хүргэх

• Улаанбаатараас гадагш 150 км радиуст эргүүлийн хяналт ажиллуулах

Орон нутгийн замд гардаг нийтлэг зөрчилд дараах байдал зонхилдог:

• Хурд хэтрүүлэх

• Аюултай нөхцөлд гүйцэж түрүүлэх, эсрэг урсгалд орох

• Хамгаалах бүс хэрэглэдэггүй, зорчигчид ч мөн анхааралгүй байдаг

• Хэт ядарсан үед жолоо барих

• Том оврын автомашин ослын тэмдэг, гэрэлтүүлэггүйгээр зогсох

• Архи, согтууруулах ундааны нөлөөнд жолоо барих

• Эрхийн үнэмлэхгүй, туршлагагүй хүнд жолоогоо шилжүүлэх

Иймд жолооч та бүхэн хөдөлгөөнд оролцохдоо:

• Зам орчноо урьдчилан шалгах

• Хурд, анхаарлаа нөхцөл байдалд тохируулах

• Хамгаалах бүсийг байнга хэрэглэх

• Хүүхдийг зориулалтын суудалд аюулгүй тээвэрлэх

• Тээврийн хэрэгслийн техникийн бүрэн бүтэн байдлыг хангах

• Тайван, соёлтой хөдөлгөөнд оролцох

гэсэн зөвлөмжийг Тээврийн цагдаагийн албанаас өгч, өөрийн болон бусдын амь нас, эрүүл мэндийг хамгаалан, осол зөрчлөөс сэргийлэхийг уриалж байна.

Эх сурвалж: Тээврийн цагдаагийн алба