Нийгмийн даатгалын ерөнхий газар сангийн чөлөөт үлдэгдлийг арилжааны банканд байршуулснаар энэ оны тавдугаар сард нийт 8.6 тэрбум төгрөгийн хүүгийн орлого олж, Нийгмийн даатгалын сангийн хөрөнгийг арвижуулсан байна. Энэ нь банкны хүүгээр сангийн хөрөнгийг үр өгөөжтэй ашиглах бодлогын хүрээнд хийгдсэн томоохон алхам юм.

Тодруулбал, 2024 оны эхэнд Нийгмийн даатгалын ерөнхий газар 700 тэрбум төгрөгийн чөлөөт үлдэгдлийг банкны системд нөлөө бүхий дөрвөн арилжааны банкинд нэг жилийн хугацаатай мөнгөн хадгаламж хэлбэрээр байршуулсан. Энэхүү шийдвэр нь Нийгмийн даатгалын үндэсний зөвлөлийн дэргэдэх орон тооны бус Мэргэжлийн хороо болон Олон нийтийн хяналтын зөвлөлөөр дамжин нягт хяналтад орж, оновчтой тооцооллын үндсэн дээр хэрэгжүүлсэн байна.

Хадгаламжийн хугацаанд нийт 105 тэрбум төгрөгийн хүүгийн орлого олохоор тооцоолж байгаа бөгөөд энэ нь нийгмийн даатгалын сангийн санхүүгийн тогтвортой байдлыг хангах, иргэдийн нийгмийн хамгааллын баталгааг дэмжихэд чухал дэмжлэг болох юм.