Баянгол дүүргийн 26 дугаар хороо, Нарны гүүрийн урд хэсэгт байрлах Энгельсийн гудамж нь бороо орох үед авто зам, явган хүний замын зорчих хэсэг усанд автдаг, үерийн аюултай бүсийн нэг байсаар ирсэн. Ус тогтож, байнга соруулдаг нөхцөл байдал нь оршин суугчдын аюулгүй байдал, хөдөлгөөний хэвийн байдалд хүндрэл учруулдаг байв.
Энэхүү асуудлыг шийдвэрлэх зорилгоор Геодези усны барилга байгууламжийн газар өнөөдрөөс эхлэн уг байршилд 1 км урттай борооны ус зайлуулах шугам угсрах ажлыг албан ёсоор эхлүүллээ. Энэ ажлын үр дүнд замын хөвөө, гудамжны борооны ус хуримтлагдахаа больж, зорчигчдын аюулгүй байдал хангагдахаас гадна авто болон явган зорчих орчны нөхцөл сайжрах хүлээлттэй байна.
Угсралтын ажил үргэлжлэх хугацаанд тухайн хэсгээр зорчих хөдөлгөөнд түр зуурын хязгаарлалт үүсч болзошгүй тул иргэдийг анхааралтай зорчихыг холбогдох байгууллагууд уриалж байна.
Эх сурвалж: НЗДТГ, Геодези усны барилга байгууламжийн газар
