Ховд аймгийн төвөөс гурваас дөрвөн километрийн зайд орших Буянт голын дагуу зуны улирал эхэлмэгц иргэд зусланд гарч эхэлдэг уламжлалтай. Энэ жилийн хувьд ч мөн адил дулаарлыг даган Буянт голын эргээр зуслах зорилготой айл өрхүүд тавдугаар сарын гучин буюу өнөөдрөөс эхлэн хөдөлгөөнд оржээ.
Зуслангийн бүсийн эрүүл ахуй, нийтийн үйлчилгээтэй холбоотойгоор “Шинэ-Ховд Жаргалант” ТҮК-аас нийтийн бие засах газрын цэвэрлэгээ, ариутгал хийсэн байна. Мөн тус байгууллагаас зуслан гарч буй иргэдэд зориулан албан ёсны зөвшөөрөл олгож, 30 мянган төгрөгийн хураамж авч эхэлжээ. Үүний зэрэгцээ байгаль орчинд ээлтэй байх дүрэм журмыг танилцуулж, бүртгэл үүсгэж байгаа аж.
Судалгаагаар жил бүр дунджаар 1000 орчим айл өрх Буянт гол дагуу зусалдаг бөгөөд энэ нь тухайн бүс нутагт тогтвортой хүний урсгал, хэрэглээ бий болгож буйг харуулж байна. Иймд албан ёсны зөвшөөрөл, дүрэм журам нь байгаль орчны тэнцвэрт байдлыг хангах, ариун цэвэр, аюулгүй байдлыг сахиулах чухал алхам болж байна.
Эх сурвалж: Ховд аймгийн ЗДТГ, “Шинэ-Ховд Жаргалант” ТҮК
