Сэлбэ голын даланг хүчитгэх, урсцыг сайжруулах, болзошгүй үерийн эрсдэлээс урьдчилан сэргийлэх зорилготой “Сэлбэ сэргэлт” төслийн хүрээнд түшиц хана барих ажил өнгөрсөн оны зургаадугаар сарын 20-нд эхэлсэн бөгөөд өнөөдрийн байдлаар 1.2 км нь хийгдээд байна. Натур орчмоос эхлэн нийт 1.4 км урт, 4–4.5 метр өндөр төмөр бетонон хийцтэй хананы ажил ирэх зургаадугаар сарын 30-нд бүрэн дуусах төлөвтэй байна.

Бүтээн байгуулалтыг “Билгүүн Монгол констракшн” ХХК гүйцэтгэж байгаа бөгөөд захиалагчийн техникийн хяналтыг Нийслэлийн Хөрөнгө оруулалтын газар хариуцан ажиллаж байна. Төслийн менежер Р.Дамбын мэдээлснээр Баянзүрх дүүргийн 41-р хороо, Сүхбаатар дүүргийн 1-р хороо зэрэг инженерийн дэд бүтэц ихтэй бүс нутагт ажил гүйцэтгэж байгаа тул инженерийн шугам сүлжээнээс шалтгаалан ажил тодорхой хэмжээнд удааширч байгаа ч одоогоор 80 гаруй хувийн гүйцэтгэлтэй, шөнийн цагаар ажиллаж замын хөдөлгөөнд саад учруулахгүй байхаар зохицуулжээ.

Түшиц хананы ажил дууссаны дараа голын голдиролын тохируулга, хашлага хайс, чулуун бэхэлгээ зэрэг нэмэлт хамгаалалтын ажлыг наймдугаар сарын 30-нд багтаан хийж дуусгахаар төлөвлөж байгаа талаар Нийслэлийн Хөрөнгө оруулалтын газрын гидротехникийн хяналтын инженер Э.Одчимэг мэдээлэв.

Түүнчлэн Улаанбаатар хотын Захирагчийн ажлын албаны Тохижилт, хог хаягдлын удирдлагын газрын дарга Г.Билгүүн “Түшиц хананы ажлыг дуусмагц тохижилтын ажлыг эхлүүлнэ. Голын дагуу ногоон байгууламж, амралтын хэсэг, гэрэлтүүлэг, явган хүний болон дугуйн замыг иж бүрнээр хийж гүйцэтгэх бөгөөд зураг төсвийг Хот төлөвлөлт, судалгааны институт боловсруулсан. Тухайн зураг төсөл Барилгын хөгжлийн төвд магадлалд орохоор хүлээгдэж байна” гэв.

Ийнхүү Сэлбэ голын дагуу хийгдэж буй бүтээн байгуулалт нь зөвхөн үерийн эрсдэлээс хамгаалахаас гадна нийтийн зориулалттай ногоон байгууламж бүхий амралт, спортын бүсийг хамтад нь бий болгох зорилготой ажээ.

Эх сурвалж: НЗДТГ