Монгол Улсын Дээд шүүх 2025 оны тавдугаар сарын 30-ны өдөр нийт шүүгчийн хуралдаан болон шүүгчдийн зөвлөгөөнийг хуралдуулахаар товлолоо. Хуралдаанаар шүүхийн хууль тогтоомжийг боловсронгуй болгох, эрх зүйн шинэтгэлтэй холбоотой хэд хэдэн чухал асуудлыг хэлэлцэх юм.

Нийт шүүгчийн хуралдаанаар хэлэлцэх гол асуудлуудын нэг нь Шүүхийн тухай хуулийн 25.8.3-т заасан бүрэн эрхийн хүрээнд тус хуулийг сайжруулахтай холбоотой санал боловсруулж, хууль санаачлагчид уламжлах тухай юм. Мөн УИХ-ын гишүүн Х.Баасанжаргалаас ирүүлсэн “Эрүүгийн хууль, Зөрчлийн тухай хууль, Зөрчил шалган шийдвэрлэх тухай хуулиудад нэмэлт, өөрчлөлт оруулах тухай” хуулийн төсөлд шүүхийн байр суурийг тусгасан санал хэлэлцэгдэнэ.

Үүнээс гадна Хууль зүй, дотоод хэргийн сайд О.Алтангэрэлээс ирүүлсэн “Шүүхийн шийдвэр гүйцэтгэх байгууллагын тогтолцоо, шийдвэр гүйцэтгэгчийн эрх зүйн байдлын тухай хууль” (шинэчилсэн найруулга), эрүүгийн болон зөрчлийн хэргийн шийдвэр гүйцэтгэлийн талаар хамаарах хуулийн төслүүд, “Гэр бүлийн хэрэг шүүхэд хянан шийдвэрлэх тухай хууль” болон “Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай” төслүүдэд өгөх саналын талаар хэлэлцэхээр байна.

Мөн хуралдаанаар Ардчилсан намын Ерөнхий нарийн бичгийн дарга Н.Ганибалаас ирүүлсэн тодруулга хүсэх тухай хүсэлт, иргэн Н.Ариунболдоос ирүүлсэн нээлттэй мэдээлэл авах тухай албан бичигтэй танилцана.

Хуралдаантай зэрэгцэн зохион байгуулагдах шүүгчдийн зөвлөгөөнөөр нийт шүүгчийн чуулганы ажлын хэсгээс ирүүлсэн хүсэлт болон бусад холбогдох асуудлуудыг авч хэлэлцэхээр төлөвлөжээ.

Эх сурвалж: Монгол Улсын Дээд шүүх