Жендэрийн Үндэсний Хорооноос “Дархан бэр”, “Уран бэр” гэх мэт хүйсэд суурилсан агуулга бүхий арга хэмжээнүүд нь хүний эрх, жендэрийн тэгш байдлын үзэл баримтлалд харшилж байгаа тул төрийн бүх шатны байгууллагууд ийм санаачилга, үйл ажиллагаанд оролцохгүй байх чиглэл өгчээ.

Тодруулбал, 2019 оны тавдугаар сарын 1-нд батлагдсан Жендэрийн үндэсний шинжээчдийн бүлгийн дүгнэлтийг үндэслэн 2025 оны тавдугаар сарын 27-ны өдрийн 136 тоот албан бичгээр аймаг, нийслэл болон есөн дүүргийн Засаг дарга, Жендэрийн салбар хорооны дарга нарт албан ёсоор дахин хүргүүлсэн байна.

Энэхүү дүгнэлтэд “Дархан бэр” өргөмжлөх болон түүнтэй төстэй бусад үйл ажиллагаа нь Монгол Улсын Үндсэн хууль, Жендэрийн эрх тэгш байдлыг хангах тухай хууль, олон улсын гэрээ, конвенцод заасан хүний эрхийн зарчимд харш, алагчлал үүсгэж болзошгүй хэмээн тодорхойлсон байна. Тиймээс дараах арга хэмжээг шат шатны байгууллагуудад хэрэгжүүлэхийг үүрэг болгожээ:

• Жендэрийн шинжээчдийн дүгнэлтийг харьяа нутаг дэвсгэртээ Иргэдийн Төлөөлөгчдийн Хурал болон бүх төрийн, төрийн бус, хувийн хэвшлийн байгууллагуудад хүргэх

• Төрийн бүх шатны удирдах албан тушаалтнуудыг https://www.ncge.gov.mn цахим хуудсанд байршуулсан жендэрийн цахим сургалтад хамруулах, шаардлагатай тохиолдолд танхимын сургалт зохион байгуулах

• Байгууллагын цахим хуудас болон орон нутгийн хэвлэл мэдээллийн хэрэгслээр уг мэдээллийг олон нийтэд таниулах

Иргэдийн гомдол, мэдээллийн дагуу төр болон төрийн бус байгууллагууд хамтран ийнхүү хүний эрх зөрчсөн үйл ажиллагаа зохион байгуулж буйг таслан зогсоох, улмаар жендэрийн тэгш оролцоог бодитоор хангах зорилгоор дээрх чиглэлийг өгчээ.

Эх сурвалж: Жендэрийн Үндэсний Хороо