Нэгдсэн Үндэстний Байгууллагын Ерөнхий ассамблей 2003 онд гаргасан A/57/129 дугаар тогтоолоор тавдугаар сарын 29-ний өдрийг “Олон улсын Энхийг сахиулагчдын өдөр” болгон зарлаж, энэ өдрийг энхийг сахиулагчдад хүндэтгэл үзүүлэх, тэдний үйлсийг олон нийтэд сурталчлах өдөр болгон тэмдэглэж ирсэн. Монгол Улс ч мөн 2012 онд Засгийн газрын 140 дүгээр тогтоолоор энэ өдрийг албан ёсоор тэмдэглэх болсон юм.
Монголын Онцгой байдлын байгууллагын алба хаагчид 2012 оноос хойш НҮБ-ын энхийг сахиулах ажиллагаанд оролцож, дэлхийн олон орны дайчин эрстэй мөр зэрэгцэн үүрэг гүйцэтгэж ирсэн. Өнөөг хүртэл нийт 300 орчим алба хаагч НҮБ-ын энхийн ажиллагаанд оролцсон бөгөөд тэдний зургаа нь эмэгтэй алба хаагчид байна. Эдгээр цэнхэр дуулгатнуудын дийлэнх нь Бүгд Найрамдах Өмнөд Судан Улсад хэрэгжиж буй “UNMISS” ажиллагаанд үүрэг гүйцэтгэж байгаа бөгөөд одоогоор Онцгой байдлын байгууллагын 19 алба хаагч XIV мотобуудлагын батальоны бүрэлдэхүүнд алба хааж байна.
Монгол Улс 2002 онд анх хоёр офицероо Бүгд Найрамдах Ардчилсан Конго Улсад цэргийн ажиглагчаар илгээж байсан бол өнөөдөр төрийн цэргийн болон хууль сахиулах байгууллагуудын олон зуун алба хаагч хүн төрөлхтний энх тайван, аюулгүй байдлын төлөө олон улсын хэмжээнд үйл ажиллагаа явуулж, хариуцлагатай үүрэг гүйцэтгэсээр байна.
