Говь-Алтай аймгийн Засаг дарга Г.Чинбат энэ сарын 28-нд Цогт сумын Баянтоорой тосгонд ажиллаж, “Ихэр марал” нэртэй мод үржүүлгийн газрын үйл ажиллагаатай газар дээр нь танилцлаа.

“Ихэр марал” мод үржүүлгийн газар нь 2022 онд аймгийн Орон нутгийн хөгжлийн сангийн дэмжлэгээр байгуулагдсан бөгөөд өдгөө нэг га талбайд говийн бүсийн нөхцөлд тохиромжтой мод, бут сөөг тарьж, бойжуулж байна. Тус байгууллагынхан буйлс, хайлаас, жигд, сухай, хармаг зэрэг 4-5 төрлийн суулгац тарьж, нийтдээ 20 мянга гаруй модны суулгацыг орон нутгийн хэрэгцээнд нийлүүлжээ.

Үүнээс гадна тус байгууллага жилд хоёр удаа ургац хураадаг гурван хүлэмжид тарвас тариалж, дунджаар 5 тонн ургац хураан авч, орон нутгийн зах зээлд нийлүүлснээр 40 орчим сая төгрөгийн орлого олдог байна. Энэ жилээс үйл ажиллагаагаа өргөжүүлэн, бэсрэг алим, торниун алим, чавга зэрэг жимсний модны тариалалтыг туршиж эхэлжээ.

Аймгийн Засаг дарга Г.Чинбат говийн эрс тэс уур амьсгалд тохируулан ногоон байгууламжийг нэмэгдүүлэх, орон нутгийн хүнсний хангамжийг сайжруулах зорилгоор хийж буй энэхүү санаачилга, үйл ажиллагааг өндрөөр үнэлж, цаашид бүх талаар дэмжиж ажиллахаа илэрхийлэв.

Эх сурвалж: Говь-Алтай аймгийн ЗДТГ