Барга угсаатны түүх, соёл, урлаг, уламжлалт зан заншлыг олон нийтэд сурталчлан таниулах зорилготой “Баргажин-2025” олон улсын наадмыг энэ оны наймдугаар сарын 9, 10-ны өдрүүдэд Төв аймгийн Зуунмод сумын төв цэнгэлдэх хүрээлэнд анх удаа зохион байгуулахаар боллоо. Наадмыг зохион байгуулах эрхийг энэ удаа Төв аймаг анх удаа авч, барга угсаатны соёлыг нутгийн иргэд, залуу хойч үед өвлүүлэхэд онцгой ач холбогдол өгч байна.

Наадмын хүрээнд зохион байгуулагдах үйл ажиллагаа олон талт, соёл, урлаг, уламжлалыг хамарсан өргөн цар хүрээтэй байх юм. Тухайлбал, ШУА-ийн Түүх, угсаатны зүйн хүрээлэн, “Чингис хаан” үндэсний музей, Төв аймгийн музейтэй хамтран “Түшээт хан аймгийн Дархан чин вангийн хошууны түүх, соёл” сэдвээр эрдэм шинжилгээний хурал зохион байгуулна. Мөн барга угсаатны хувцас загварын уралдаан, эд зүйлийн үзэсгэлэн, ардын дуу хөгжмийн улсын уралдаан, үндэсний бөхийн барилдаан, сурын “Түнх” харваа зэрэг арга хэмжээнүүдийг төлөвлөсөн байна.

Энэхүү наадам нь зөвхөн соёлын баяр наадам төдий бус, үндэсний өв, олон угсаатны соёлын дархлааг тэтгэх, судалгаа, танин мэдэхүйн ач холбогдолтой үйл явдал байх юм. Наадмын ажлын багийн ахлагч бөгөөд Төв аймгийн Засаг даргын зөвлөх Б.Отгонбаярын мэдээлснээр, тус наадмыг цаашид үндэсний хэмжээний брэнд эвент болгох зорилготойгоор наадмын үндсэн брэндбүүк боловсруулж буй аж.

“Барга судлалын холбоо” ТББ-ын тэргүүн Д.Мөнхтөмөрийн мэдээлснээр барга угсаатан нь өнөөдөр Дорнод, Төв, Хэнтий, Булган, Завхан аймаг, Улаанбаатар хотын тодорхой хэсэгт суурьшиж байгаа бөгөөд Төв аймгийн Баян, Баянцагаан, Сэргэлэн, Зуунмод сумдад харьцангуй олон барга угсаатан оршин суудаг байна.

“Баргажин” наадмыг анх 2007 онд Дорнод аймгийн Хөлөнбуйр суманд зохион байгуулсан бөгөөд түүнээс хойш гурван жил тутамд нэг удаа Дорнод аймгийн Гурванзагал, Чойбалсан, мөн ОХУ-ын Буриадын Улаан-Үд хотод ээлжлэн зохион байгуулж ирсэн түүхтэй. Энэ жил ийнхүү анх удаа Төв аймагт зохиогдох гэж буй нь тус нутгийн түүх, соёлын өвийг өргөн хүрээнд таниулах томоохон боломж болж байна.

Эх сурвалж: Төв аймгийн ЗДТГ