Нийслэлийн хэмжээнд энэ онд нийт 15 байршилд явган хүний замыг байгалийн чулуун хавтангаар шинэчлэхээр төлөвлөсөн бөгөөд өнөөдрийн байдлаар есөн байршилд засвар, тохижилтын ажил ид үргэлжилж байна. Тухайлбал, тавдугаар сарын 27-ны өдрөөс эхлэн Д.Сүхбаатарын талбайн хоёр талд нийт 5012 ам метр талбай бүхий явган хүний замыг шинэчлэх ажлыг эхлүүлээд байна.

Уг ажилд Улаанбаатар хотын Захирагчийн ажлын алба, Нийслэлийн замын хөгжлийн газар, Нийслэлийн хөрөнгө оруулалтын газар зэрэг байгууллагууд хамтран ажиллаж байгаа бөгөөд шинэчлэлийн хүрээнд Энхтайваны өргөн чөлөө, Их тойруу, Бага тойруу, Их Монголын гудамж, Чингисийн өргөн чөлөө зэрэг хотын гол гудамжууд багтжээ. Шинэчлэлд ашиглаж буй байгалийн чулуун хавтан нь барзгар гадаргуутай тул цас, бороотой үед гулгах, халтирах эрсдэл багатайг холбогдох албаныхан онцоллоо.

УБЗАА-ны Тохижилт, хог хаягдлын удирдлагын газрын дарга Г.Билгүүний хэлснээр, шинэчлэлд ашиглах байгалийн чулууг хот төлөвлөлтийн зураг төслийн дагуу сонгож, 2024 онд зураг төслийг боловсруулан батлуулсан. Тендер зарлахад анхны удаад аж ахуйн нэгжүүд оролцоогүй тул дахин тендер зарлаж, есөн байршилд гүйцэтгэгч байгууллагуудтай гэрээ байгуулжээ. Үлдсэн зургаан байршилд худалдан авах ажиллагаа үргэлжилж байна.

Өнгөрсөн онд нийслэлийн хэмжээнд 87 байршилд авто зам шинэчилсэн бол энэ жил тэдгээрийн зургаан гол гудамжны явган замыг байгалийн чулуун хавтангаар шинэчилж байна. Харин туслах гудамж, замуудын явган хүний замыг асфальт бетоноор нөхөн сэргээж байгаа бөгөөд хөгжлийн бэрхшээлтэй иргэд болон дугуй, тэргэнцэртэй иргэдийн зорчиход хүндрэлгүй байлгах тэмдэглэгээг давхар хийж буй юм.

Хотын инженерийн шугам сүлжээний өргөтгөл зэрэгтэй уялдуулан зарим ажил хойшлогдож болзошгүй тул иргэдийг тэвчээртэй хандахыг албаныхан уриаллаа. Төлөвлөсөн бүх ажил 2025 оны арваннэгдүгээр сард багтаж дуусах юм.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс