Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул энэ оны тавдугаар сарын 28-ны өдөр Дэлхийн банкны зөвлөх, ахлах эдийн засагч Ян Хуантай уулзаж, хамтран хэрэгжүүлж буй төсөл хөтөлбөрийн явц, ирэх үе шатны талаар санал солилцов.

Дэлхийн банктай хамтран хэрэгжүүлж буй Онцгой байдлын үеийн дэмжлэг болон хөдөлмөр эрхлэлтийн төсөл өнөөдрийн байдлаар 86 хувийн гүйцэтгэлтэй байна. Төслийн хүрээнд хөдөлмөрийн зах зээлийн шинэчлэлийг хангах зорилгоор “И-Жоб” цахим бүртгэлийн платформыг нэвтрүүлж, төрийн үйлчилгээг цахим хэлбэрт бүрэн шилжүүлэх “Цахим үндэстэн” хөтөлбөрийн хэрэгжилтэд дэмжлэг үзүүлсэн нь иргэдэд илүү хялбар, ил тод орчин бүрдүүлэхэд түлхэц болсон.

Мөн бичил бизнес эрхлэгчдийг дэмжих зорилгоор 50 хүртэлх сая төгрөгийн жижиг зээл олгосноор нийт 536 иргэнийг шинээр ажлын байраар хангаж, 1,119 ажлын байрыг хадгалах үр дүнд хүрчээ. Үүнээс гадна 2024 онд Хөдөлмөр, нийгмийн хамгааллын сургалт, үнэлгээ, судалгааны институт “Эрэлтэд нийцсэн ур чадвар олгох хөтөлбөр”-ийг хэрэгжүүлж, хөдөлмөрийн зах зээлд эрэлттэй 17 чиглэлээр нийт 725 иргэнд ур чадвар олгож, 300 иргэнийг мэргэшүүлэх сургалтад, 200 иргэнийг өмнөх мэдлэг, туршлагыг үнэлэх (RPL) үйлчилгээнд хамруулсан байна.

2025 онд салбарын мэдээллийн нэгдсэн сан болон системүүдийг үе шаттайгаар дундын үүлэн дэд бүтэц рүү шилжүүлж, их өгөгдлийг боловсруулан төрийн үйлчилгээг оновчтой хүргэхэд төслийн хүрээнд дэмжлэг үзүүлэхээр төлөвлөжээ. Ингэснээр салбарын бодлогын үр нөлөө дээшилж, иргэдэд чиглэсэн үр дүнтэй шийдвэр гаргах үндэс суурь бүрдэхээр байна.

Эх сурвалж: Гэр бүл, хөдөлмөр, нийгмийн хамгааллын яам