Улсын онцгой комиссын шийдвэрийн дагуу Сэлэнгэ аймагт гарсан ой хээрийн түймэрт өртсөн дөрвөн өрхөд иж бүрэн 5 ханатай гэр олголоо.
Тодруулбал, гал түймрийн улмаас орон гэр нь бүрэн шатсан Цагааннуур сумын гурван өрх, Зүүнбүрэн сумын нэг өрхөд тусламжийн хүрээнд шинэ гэр хүлээлгэн өгсөн байна.
Шал, давхар бүрээстэй, дулаалгатай иж бүрэн 5 ханатай эдгээр гэрийг өнөөдөр аймгийн Засаг дарга Н.Лхагвадорж хүлээлгэн өгч, орон гэргүй болсон иргэдэд дахин амьдрах нөхцөлийг бүрдүүлсэн юм.
Энэхүү дэмжлэг нь онцгой нөхцөл байдалд нэрвэгдсэн иргэдийн ахуйн амьдралыг сэргээж, түргэн хугацаанд хэвийн амьдралд нь оруулах зорилготой бодит тусламж боллоо.
Эх сурвалж: Сэлэнгэ аймгийн ЗДТГ
