Сэлэнгэ аймагт “Таблеттай багш” санаачилгын хүрээнд алслагдсан бүсийн хүүхдүүдийг хамарсан сургалтын үйл ажиллагаа албан ёсоор эхэллээ. Энэхүү санаачилга нь сургуулийн өмнөх насны хүүхдийн боловсролд тэгш хүртээмжтэй байдлыг хангах, мэдээлэл харилцааны шинэ технологид суурилсан дэмжлэг үзүүлэх зорилготой юм.
Аймгийн 17 сум, 6 тосгоны алслагдсан баг, малчин өрхөд амьдардаг 700 гаруй хүүхэд, тэдний гэр бүл энэхүү санаачилгад нэгдэж байгаа бөгөөд тэд гэр бүлийн орчинд эцэг эх, асран хамгаалагч болон явуулын багшийн тусламжтайгаар сургалтын үйл ажиллагаанд хамрагдах юм.
Сургалтын нээлтийн үйл ажиллагаанд аймгийн Засаг даргын орлогч Ж.Сайнцог, Нийгмийн бодлогын хэлтсийн дарга Ц.Рэгзэдмаа, Боловсролын газрын дарга С.Тулга нар оролцож, 24 багш, мэргэжилтэнд сургалтын ухаалаг багц хэрэглэгдэхүүн гардуулан өгчээ.
“Таблеттай багш” санаачилга нь 2023 оноос Боловсролын яам, Боловсролын ерөнхий газар, НҮБ-ын Хүүхдийн сангийн хамтын ажиллагаагаар хэрэгжиж эхэлсэн бөгөөд өнөөдрийн байдлаар:
-
18 аймгийн 310 сумын 433 цэцэрлэг
-
Хилийн анги салбар бүлгийн 10,567 хүүхэд
-
Эдгээр хүүхдүүдийн эцэг эх, асран хамгаалагч нар
уян хатан, хувилбарт сургалтын дэмжлэгтэйгээр боловсролын үйлчилгээнд хамрагдаад байна.
Боловсролын ерөнхий газраас уг санаачилгад нэгдсэн аймгуудыг мэргэжил арга зүйн чиглэлээр дэмжиж, хүүхэд, гэр бүлд тохирсон, мэдээллийн технологид суурилсан сургалтын ухаалаг багц боловсруулан хүргэж буй юм.
Сургалтын нээлтийн дараа аймаг, сум, багийн удирдлагууд, мэргэжилтнүүд, багш нар хамтран хэлэлцүүлэг өрнүүлж, орон нутгийн түвшинд бага насны хүүхдийн хөгжил, боловсролыг гэр бүлийн орчинд хэрхэн дэмжих талаар цаашдын төлөвлөгөөг хэлэлцлээ.
Эх сурвалж: Сэлэнгэ аймгийн Боловсролын газар, Боловсролын ерөнхий газар
