Сэлэнгэ аймгийн ИТХ-аас сүрьеэтэй тэмцэх зорилгоор “Сүрьеэгийн тусламж, үйлчилгээг сумын эрүүл мэндийн төвийн түвшинд бэхжүүлэх нь” болон “Сүрьеэгүй Сэлэнгэ” хөтөлбөрүүдийг шат дараатай хэрэгжүүлж байна.

Энэ хүрээнд Монголын сумын эмч, мэргэжилтнүүдийн холбоотой хамтран Эрүүл мэндийн яам болон Глобал сангийн дэмжлэгтэй хэрэгжиж буй “Монгол Улсын ДОХ, сүрьеэ өвчнөөс урьдчилан сэргийлэх, эмчлэх, тусламж үйлчилгээний үндэсний тогтолцоог бэхжүүлэх нь” хөтөлбөрийн хүрээнд “Хаалганаас-хаалганд” сүрьеэгийн эрт илрүүлэг үзлэгийг зохион байгуулсан байна.

Тус илрүүлгийн баг энэ сарын 3–4, 17–18-ны өдрүүдэд “Болдтөмөр Ерөө гол” ХХК-ийн Баянгол уурхайд хоёр удаа ажиллаж, хиймэл оюун ухаанд суурилсан зөөврийн дижитал рентген төхөөрөмж ашиглан нийт 1500 гаруй уурхайчин, албан хаагчдыг үзлэгт хамруулжээ.

Үзлэгийн үр дүнд сүрьеэгийн нэг тохиолдлыг эрт илрүүлж, шууд эмчилгээний шатанд шилжүүлсэн нь өвчлөлийг оройтохоос сэргийлэх, халдварын тархалтыг бууруулах чухал үр дүн болж байна.

Сүрьеэгийн эрт илрүүлэг, нийгмийн оролцоог хослуулсан энэхүү арга хэмжээ нь сум орон нутгийн түвшинд эрүүл мэндийн тусламж, үйлчилгээний хүртээмжийг нэмэгдүүлж, хүн амыг сүрьеэгийн эрсдэлээс хамгаалахад бодит дэмжлэг болж байна.

Эх сурвалж: Сэлэнгэ аймгийн ИТХ, ЭМЯ.