Нийслэлийн Засаг даргын Тамгын газраас архи, согтууруулах ундаа, тамхи зэрэг донтуулах хэрэглээг бууруулж, хүүхэд, өсвөр үеийнхэнд зөв дадал, хандлага төлөвшүүлэх зорилгоор “Хүүхдийн төлөө — миний сонголт” аяныг эхлүүлээд байна.

Аяныг тавдугаар сарын 20-ноос эхлэн 30 хоногийн хугацаатай хэрэгжүүлж буй бөгөөд энэ хугацаанд тамхи болон дам тамхидалт, архи, согтууруулах ундаа, сэтгэцэд нөлөөт бодисын хэрэглээний хор уршгийг олон нийтэд таниулах, хууль тогтоомжийг сурталчлах, нийгмийн ухамсарт эерэг өөрчлөлт оруулахад чиглэж байна.

НЗДТГ-аас дүүргийн Засаг дарга нар болон нийслэлийн нутгийн захиргааны байгууллагын дарга нарт аяныг дэмжин, идэвхтэй оролцох чиглэл өгсөн бөгөөд олон нийт, иргэд, аж ахуйн нэгжүүдийг хамтран ажиллахыг уриалж байна.

Түүнчлэн дэлхийн “Тамхигүй өдөр” (5-р сарын 31) болон “Олон улсын хүүхдийн эрхийг хамгаалах өдөр” (6-р сарын 1)-тэй холбогдуулан дараах хязгаарлалтыг нийслэлд тогтоолоо:

• Архи, согтууруулах ундаа худалдах, түүгээр үйлчлэхийг хориглосон

• Тамхи худалдахгүй байхыг аж ахуйн нэгж, байгууллагуудад уриалсан байна

Эдгээр өдрүүдэд зөв дадал, эрүүл амьдралын хэв маягийг сурталчилж, хүүхдийн хөгжлийг дэмжих зорилго бүхий арга хэмжээнүүд нийслэлийн хэмжээнд өрнөх юм.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс