Гадаадын иргэн, харьяатын газраас гадаадын иргэдийн бүртгэл, хяналт шалгалтыг төлөвлөгөөт болон төлөвлөгөөт бус байдлаар тогтмол хийж, хууль тогтоомжийн хэрэгжилтэд хяналт тавьсаар байна.

Өнгөрсөн долоо хоногт хийсэн хяналт шалгалтын хүрээнд нийт 4 улсын 39 иргэнийг Монгол Улсаас албадан гаргаж, 3–5 жилийн хугацаанд дахин нэвтрэхийг хориглосон шийдвэр гаргасан байна. Албадан гаргагдсан иргэдийн дийлэнх нь БНХАУ-ын иргэд байсан бөгөөд тоон үзүүлэлтээр:

• БНХАУ — 31 иргэн

• БНСУ — 5 иргэн

• БНУзУ — 2 иргэн

• Тайландын Хаант Улс — 1 иргэн байна.

Зөрчлийн шалтгааныг авч үзвэл:

• 25 иргэн ирсэн зорилгоосоо өөр үйл ажиллагаа явуулсан

• 3 иргэн хуурамч бичиг баримт ашиглаж виз, оршин суух зөвшөөрөл авсан

• 4 иргэн визийн хугацаа хэтрүүлсэн зөрчил гаргасан байна.

Сүүлийн жилүүдэд аялал жуулчлалын зорилгоор зорчиж буй гадаадын иргэдийн тоо нэмэгдэж, цахим визийн систем өргөжсөнтэй холбоотойгоор визийн нөхцөлийг хөнгөвчилсөн хэдий ч зарим иргэн түүнийг зөрчин, зөвшөөрөлгүй хөдөлмөр эрхлэх, хугацаа хэтрүүлэх зэрэг зөрчлүүд гаргах болсон.

Тухайлбал, энэ оны эхний хугацаанд албадан гаргасан гадаадын иргэдийн тоо өмнөх оны мөн үетэй харьцуулахад 70.6 хувиар өссөн нь анхаарал татаж байна.

Иймд Гадаадын иргэн, харьяатын газраас гадаадын иргэн болон түүнийг уригч иргэн, байгууллагуудад Монгол Улсын хууль тогтоомжийг чандлан сахиж, аливаа зөрчилд холбогдохгүй байхыг онцгойлон сануулж байна.

Эх сурвалж: Гадаадын иргэн, харьяатын газар