Улсын төсвийн хөрөнгөөр хэрэгжиж буй Сонгинохайрхан дүүргийн 5 дугаар хорооны нутаг, Хүүхэд залуучуудын театр дагуух 1.6 км авто замын ажил 2020 онд эхэлсэн ч үргэлжилсээр байна. Тус замын гүйцэтгэгчээр “Баян-Өлзийт Зам” ХХК шалгарч, 2020 оны долоодугаар сард гэрээ байгуулжээ.
Хэдий тийм боловч өнөөдрийг хүртэл газар чөлөөлөлт бүрэн дуусаагүй, трасст өртсөн айл өрхүүдтэй зөвшилцөх ажил үргэлжилж байгаа юм. Гэтэл дээрх компани хуулийн дагуу хүлээлгэх ёстой нөхцөл, шаардлагыг зөрчиж, хяналтын инженерийн зөвшөөрөлгүйгээр ажлыг эхлүүлжээ. Тодруулбал, цахилгааны шонг шилжүүлээгүй, газар чөлөөлөөгүй хэсэгт норм, стандарт зөрчин дур мэдэн барилгын ажил хийсэн байна.
Үүний улмаас зорчих хэсэгт саад учруулж байсан цахилгааны шонг өнгөрсөн шөнө зөөж, авто замын хөдөлгөөнийг хэвийн болгосон байна.
Нийслэлийн Захирагчийн ажлын албанаас уг зөрчилд хариуцлага тооцож, “Баян-Өлзийт Зам” ХХК-ийг хар жагсаалтад оруулж, холбогдох хууль тогтоомжийн дагуу арга хэмжээ авахаа мэдэгдлээ.
Эх сурвалж: НЗХГ
