Цахилгаан дугуй (суррон), цахилгаан скүүтер зэрэг бичил цахилгаан тээврийн хэрэгслийн хэрэглээ огцом өсөж буйтай холбогдуулан тэдгээрийн хөдөлгөөнд оролцох нөхцөл, журам, хариуцлагын асуудлыг хуульчилж тодорхой болгох шаардлага үүссэн. Үүнтэй холбогдуулан Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төслийг боловсруулж, өнөөдөр олон нийтийн хэлэлцүүлгийг зохион байгууллаа.
Хэлэлцүүлгийг УИХ-ын гишүүн, ажлын хэсгийн ахлагч П.Батчимэг нээж, хуулийн төслийн агуулга, шаардлагын талаар танилцуулсан юм. Тэрбээр, сүүлийн таван жилийн хугацаанд цахилгаан дугуй, скүүтерийн хэрэглээ эрс нэмэгдэж, үүнтэй холбоотойгоор 584 осол, гэмтэл бүртгэгдсэн болохыг дурдлаа. Ялангуяа сүүлийн хоёр жилд ослын тоо дөрөвөөс тав дахин өссөн нь анхаарал татаж байгаа бөгөөд ослын дийлэнх нь 10-19 насны хүүхэд, залуучууд байгааг тодотгов.
Одоогийн мөрдөгдөж буй хууль, дүрмийн хүрээнд эдгээр тээврийн хэрэгслийн ангилал, техник, жолоодох нас, хэрэглээнд тавигдах шаардлагууд тодорхой бус байгаа нь замын хөдөлгөөний аюулгүй байдалд ноцтой эрсдэл үүсгэж буйг ажлын хэсгийн танилцуулгад онцоллоо. Мөн цахилгаан тээврийн хэрэгслийг түрээсээр олгодог байгууллагад тавих хяналт, шаардлагын эрх зүйн орчин ч бүрдээгүй байгааг шүүмжилсэн юм.
Шинээр боловсруулсан хуулийн төсөлд дараах үндсэн заалтууд тусгагдсан байна:
-
“Цахилгаан скүүтер”, “Цахилгаан дугуй”, “Хувь хүний бичил цахилгаан тээврийн хэрэгсэл” гэсэн тээврийн хэрэгслийн ангиллыг хуульчилна
-
Жолоочийн насны доод хязгаар, хөдөлгүүрийн хүчин чадал, хамгийн бага ба дээд хурд, тээврийн хэрэгслийн жин, тоноглол, зорчих замын ангилал зэргийг тодорхой болгоно
-
Жолоочийн үүрэг, хариуцлага, хориглох үйлдэл, аюулгүй байдал хангах дүрэм тусгагдана
-
Нийтийн хэрэглээний цахилгаан тээврийн хэрэгсэл түрээслэгч байгууллагын эрх, үүрэг, тусгай зөвшөөрлийн нөхцөл, шаардлага хуульчлагдана
Ажлын хэсэг хуулийн төслийг боловсруулахдаа гадаадын улс орнуудын эрх зүйн туршлага, зохицуулалтын жишээг судалсан бөгөөд хэлэлцүүлгийн дараа иргэдийн санал, шүүмжлэлийг тусган сайжруулалт хийхээ илэрхийллээ.
