Нийслэлийн хэмжээнд энэ зунаас эхлэн 41 байршилд нийт 74 км авто замыг шинэчлэх засварын ажил эхэлсэн бөгөөд гол замуудын ажлыг долоодугаар сарын 5-наас өмнө дуусгах төлөвлөгөөтэй байна. Тухайлбал, олон жил засвар хийгдээгүй Энхтайваны өргөн чөлөөний зам дээр шинэчлэл хийгдэж байгаа бөгөөд энэ удаа анх удаа полимер битум хэмээх шинэ төрлийн материалыг ашиглаж байгааг албаны хүмүүс мэдээлжээ.

Полимер битум нь халуунд тэсвэртэй, хүнд даацын тээврийн хэрэгслээс үүдэн авто зам дээр үүсдэг дугуйн мөрний ховилыг багасгах давуу талтай. Нийслэлийн Замын хөгжлийн газрын дарга Б.Одбаярын хэлснээр, агаарын температур 60 хэм хүрсэн ч замд ховил үүсэхгүй, замын чанар, насжилтыг нэмэгдүүлэх өндөр үр нөлөөтэй хэмээн онцолсон байна.

Хотын төвийн замуудыг шинэчлэх ажилд замын хөдөлгөөнд саад учруулахгүй байх үүднээс суурь болон хучилтын ажлыг шөнийн цагаар, харин өнгө хучилтын ажлыг өдрийн цагаар, амралтын өдрүүдэд гүйцэтгэж байна. Учир нь шөнийн сэрүүнд полимер материал нягт суухгүй, замын чанарт сөргөөр нөлөөлөх эрсдэлтэй аж.

Өчигдөр, өнөөдөр дараах авто замуудын засварыг дуусгаж, хөдөлгөөнийг нээжээ:

• Чингэлтэй өргөн чөлөөнөөс Хайлааст хүртэлх 4 км

• Энхтайваны өргөн чөлөөнөөс Сэлбэ голын баруун эрэг дагуу Их тойруу хүртэл

• Шадивлан зуслангаас Дамбадаржаа хүртэлх 2 км

• Эрдэнэтолгойн уулзвараас Шархадны эцэс хүртэлх зам

Шинэчлэлийн хүрээнд замын бүтэц, материалыг сайжруулж буй нь иргэдийн ая тухтай, аюулгүй зорчих орчныг бүрдүүлэхэд чиглэж байгааг холбогдох албанаас онцоллоо.

Эх сурвалж: Нийслэлийн Замын хөгжлийн газар