Гадаадын иргэн, харьяатын газраас “Бүртгэл - Хариуцлага, хамгаалалт” нэртэй нөлөөллийн аяныг өчигдөр эхлүүллээ. Энэ аян нь гадаадын иргэнийг орон байраар хангаж буй иргэн, аж ахуйн нэгж, байгууллагуудын хариуцлагыг сайжруулах, зөрчлөөс урьдчилан сэргийлэх зорилготой юм.

Хуульд зааснаар гадаадын иргэнийг байрлуулсан этгээд тухайн хүнийг 48 цагийн дотор Гадаадын иргэн, харьяатын газарт бүртгүүлэх үүрэгтэй. Уг бүртгэлийг цахимаар буюу e-mongolia.mn болон isf.mn систем ашиглан хийх боломжтой. 2025 оны эхний дөрвөн сарын байдлаар 14 мянга 310 гадаадын иргэнийг цахим системээр бүртгүүлжээ.

Энэхүү бүртгэл нь гадаадын иргэний аюулгүй байдал, болзошгүй эрсдэлээс сэргийлэх суурь хяналтын нэг хэлбэр юм. Мөн бүртгэлийн мэдээлэл үнэн зөв байх нь аяллын маршрутыг тодорхойлоход тусалж, жуулчдад зориулсан бүсүүдийг төлөвлөхөд ч чухал нөлөө үзүүлнэ.

Иймд зочид буудал, амралтын газар, аялал жуулчлалын байгууллагуудыг энэхүү аянд идэвхтэй оролцож, гадаадын иргэдийг хуульд заасан хугацаанд цахимаар бүртгүүлэхийг уриалж байна.

Эх сурвалж: Gadaad.gov.mn