Чингэлтэй, Сүхбаатар дүүргийн 158 га талбайг хамарсан “20 минутын хот” төслийн жишиг болох Сэлбэ дэд төвийн бүтээн байгуулалт энэ сарын 29-ний Пүрэв гарагт албан ёсоор эхэлнэ. Уг төсөл нь нийтийн тээвэр, боловсрол, эрүүл мэнд, худалдаа үйлчилгээ зэрэг өдөр тутмын хэрэгцээг 20 минутын зайд төвлөрүүлсэн ухаалаг хот төлөвлөлтийн жишиг хэлбэр юм.

Эхний ээлжийн хоёр багц тендерийн гүйцэтгэгч шалгарч, 6 буудал болон Оргил худалдааны төвийн орчмын 25.6 га газарт ойролцоогоор 4400 айлын орон сууц барих ажлаа эхлүүлэх гэж байна. Энэ нь нийслэлийн төвийн бүс дэх хүн амын нягтралыг зөв зохион байгуулах, хотын дэд бүтцийг үе шаттайгаар сайжруулах зорилготой.

Төслийн хүрээнд хийгдэж буй нийгмийн болон инженерийн дэд бүтцийн ажлууд нь цогц байдлаар хэрэгжиж байгаа бөгөөд дараах гол бүтээн байгуулалтыг аль хэдийн хэрэгжүүлээд байна:

• 6.7 км авто зам

• 5.3 км цахилгаан холбооны шугам

• 9.7 км дулааны шугам

• 19.7 км ус хангамж, ариутгах татуургын шугам

• 2.4 км үерийн усны хамгаалалтын далан суваг

• 1000 м³ багтаамжтай усан сан

• 3 гүүр, дулааны станц

• Мэдээлэл холбооны төв

• Бизнес, инкубатор, сургалтын төв

• Дэд станц

• 150 болон 240 хүүхдийн хоёр цэцэрлэг

Уг дэд төвийн хөгжлийн төслөөр дамжуулан Улаанбаатар хотын төвлөрөл, хэт ачааллыг бууруулж, иргэдийн амьдралын чанарыг сайжруулах, ногоон, ухаалаг, хүртээмжтэй хөгжлийг төлөвлөн хэрэгжүүлж буйг албаныхан онцолж байна.

Эх сурвалж: Нийслэлийн Засаг даргын Тамгын газар