Эрчим хүчний гудамж дагуух авто замын өргөтгөл, их засварын ажлын хүрээнд Сонсголонгийн замын уулзвараас “ТЭЦ-IV”-ийн зүүн уулзвар хүртэлх хэсэгт инженерийн дэд бүтцийн сувагчлалын ажил хийгдэж, хөдөлгөөнийг хэсэгчлэн нээжээ. Тодруулбал, уурын шугам, дулааны шугамын сувагчлал, холбооны шугамын хамгаалалтын хонгилын ажил хийгдэж, мөн далангийн өргөсгөлт, ухмалын ажил, гео тор дэвсэлт, хөрсний дүүргэлт зэрэг суурь бүтцийн ажлууд дуусчээ.
Эдгээр ажлуудыг нийслэлийн авто замын сүлжээг ачаалал багатай, инженерийн байгууламжтай уялдсан хэлбэрээр өргөтгөх зорилгоор хэрэгжүүлж буйг Нийслэлийн Замын хөгжлийн газраас мэдээлсэн байна. Тус гудамж нь иргэдийн зорчих хөдөлгөөний гол чиглэлүүдийн нэг учир өргөтгөл, шинэчлэл нь тээврийн ачааллыг бууруулах чухал нөлөөтэй гэж үзэж буй юм.
Эх сурвалж: Нийслэлийн Замын хөгжлийн газар
