Нийгмийн халамжийн тухай болон Гэр бүлийг дэмжих тухай хуулийн шинэчилсэн найруулгын төслийг холбогдох яамд, Ази хөгжлийн банк, НҮБ-ын Хүүхдийн сан, Эрүүл мэндийн даатгалын газар, Сэтгэцийн эрүүл мэндийн үндэсний төвийн мэргэжилтнүүдэд танилцууллаа.

Хуулийн төслийг шинэчлэхдээ халамжийн хөтөлбөрүүдийг зорилтот бүлэгт чиглүүлэх, нэр төрөл, хүртээмжийг оновчтой болгох, зарим давхардсан үйлчилгээг нэгтгэх замаар үр ашигтай байдлыг нэмэгдүүлэхийг зорьж байна. Түүнчлэн бэлэн мөнгөний бус, хөгжүүлэлтийн чиглэлтэй үйлчилгээ нэвтрүүлэхээр төлөвлөж, иргэдийг бие даан амьдрах, хөдөлмөр эрхлэх чадвартай болгоход чиглэсэн, хугацаа, хязгаартай тэтгэмж, тусламжийг бий болгохоор тусгасан байна.

Халамжийг хэт их хүртээмжтэй бус, харин зорилтот иргэдэд хүрдэг, өөрийгөө хөгжүүлэх, амьдралын чанараа дээшлүүлэх боломжоор хангах зарчмыг баримталж байгаагаараа энэхүү шинэчилсэн найруулга онцлогтой юм.

Нөгөөтэйгүүр, Гэр бүлийг дэмжих тухай хуулийн шинэчилсэн найруулгад гэр бүлд ээлтэй орчин бүрдүүлэх, ажил амьдралын тэнцвэрийг хангах, эх, эцэг, хүүхдэд чиглэсэн мөнгөн тэтгэмж олгох, гэр бүлийн хөгжлийг дэмжих тогтолцоог бүрдүүлэх бодлогын зохицуулалтыг тусгажээ. Энэ нь тогтвортой хөгжилд суурилсан нийгмийн хамгааллын цогц тогтолцоог бүрдүүлэх зорилготой юм.

Шинэчилсэн найруулгын төсөл нь нийгмийн халамжийг зөв гольдролд оруулах, гэр бүлийн хөгжлийг бодлогоор дэмжих чиглэлээр төрийн дунд хугацааны томоохон зорилт болж байна.

Эх сурвалж: Хөдөлмөр, нийгмийн хамгааллын яам