Нийслэлийн Засаг даргын захирамжийн дагуу цэргийн дүйцүүлэх албаны биечлэн хаах иргэдийн бэлтгэл шатны сургалтыг өнөөдрөөс эхлүүлээд байна. Уг сургалтад нийслэлийн есөн дүүргээс ирсэн иргэд хамрагдаж байгаа бөгөөд сургалтыг Зэвсэгт хүчний 120 дугаар ангийн материаллаг бааз дээр зохион байгуулж байна.

Сургалтыг Батлан хамгаалах яамны Төрийн нарийн бичгийн даргын баталсан хөтөлбөрийн дагуу цэргийн штабын офицер, ахлагч нар удирдан явуулж байгаа бөгөөд зорилго нь дүйцүүлэх алба хааж буй иргэдийг эх орноо хамгаалах үүрэгт бэлтгэх, цэргийн анхан шатны мэдлэг, чадвар олгоход чиглэж байна.

Монгол Улсын хууль тогтоомжийн дагуу цэргийн дүйцүүлэх албыг хоёр хэлбэрээр — биечлэн болон мөнгөн төлбөрөөр — хааж болдог. Хугацаат цэргийн алба хаах насны дээд хязгаарт хүрсэн, алба хаагаагүй иргэд мөнгөн төлбөрийн хэлбэрээр дүйцүүлэх албыг орлуулан хаах боломжтой. Төлбөрийн хэмжээг Засгийн газар жил бүр тогтоодог бөгөөд энэ нь цэргийн алба хаагчийн тухайн жилийн дундаж хангамж, үйлчилгээний зардлаас хамаардаг.

Мөн дүйцүүлэх албыг мөнгөн хэлбэрээр орлуулах, эсвэл уг төлбөрөөс чөлөөлөх шийдвэрийг сум, хорооны Засаг даргын тодорхойлолт, иргэний хувийн баримт бичиг, нийгмийн халамж, эрүүл мэндийн үзүүлэлт зэрэг мэдээлэлд үндэслэн цэрэг татлагын товчоо дүгнэж, аймаг, дүүргийн Цэргийн штабын саналыг үндэслэн эцэст нь Засаг дарга гаргадаг юм.

Эх сурвалж: Нийслэлийн ЗДТГ, Батлан хамгаалах яам