Өнөөдөр 08:00 цагийн орчимд Хан-Уул дүүргийн 8 дугаар хорооны нутаг, Сонсголонгийн гүүрний урд замд ачааны автомашин авто замын барилга байгууламж болох хашлага мөргөн эвдэлж буй бичлэг олон нийтийн сүлжээнд нийтлэгдлээ. Уг зөрчилтэй холбоотойгоор Тээврийн цагдаагийн албанаас шуурхай шалгалтын ажиллагаа явуулж, тээврийн хэрэгслийн улсын дугаар болон жолоочийг тогтоон, ослын газарт нөхөн үзлэг хийж, хариуцлага тооцох ажиллагааг эхлүүлсэн байна.

Мөн Тээврийн цагдаагийн алба тавдугаар сарын 19-нд иргэдийн гомдлын дагуу Улаанбаатар хот руу нэвтэрч буй том оврын тээврийн хэрэгслүүдийг шалгаж, дараах зөрчлүүдийг илрүүлжээ:

• Тээврийн хэрэгслийн жинг хэтрүүлсэн

• Хучлагагүй ачаа тээвэрлэсэн

• Замын байгууламжид эвдрэл учруулсан

• Зуурмаг, шороо асгасан

Илэрсэн зөрчлүүдийн дагуу Зөрчлийн тухай хуулийн 14.7 дугаар зүйлийн 47 дахь хэсэгт үндэслэн торгуулийн арга хэмжээ авсан байна.

Нийслэлд авто замын хайс, тэмдэг, хурд сааруулагч зэрэг эд ангиудыг тээврийн хэрэгслүүд эвдэх зөрчил нэмэгдэж байгаа бөгөөд зөвхөн 2024 онд л гэхэд:

• 903 авто замын тэмдэг, 2176 тэмдэг арчилгаа

• 380 ам.метр хурд сааруулагч болон түүний тэмдэглэгээ эвдэрч, нийслэлийн Замын сангийн хөрөнгөөр засжээ.

2025 онд энэ тоо өсөх төлөвтэй байгаа бөгөөд 2550 авто замын тэмдэг, 2620 тэмдэг арчилгаа, 1000 ам.метр хурд сааруулагч, 3000 метр хайс, тоноглолыг засварлах төсөв батлагдсан байна.

Иймд нийслэлийн авто замын ашиглалт, аюулгүй байдалд гамтай хандаж, ялангуяа том оврын тээврийн жолооч нарыг замын хөдөлгөөнд соёлтой, хариуцлагатай оролцохыг холбогдох байгууллагууд уриаллаа.

Эх сурвалж: Тээврийн цагдаагийн алба, Нийслэлийн Замын сан.