Монгол Улсын Ерөнхийлөгч Ухнаагийн Хүрэлсүх Олон улсын хүүхдийн эрхийг хамгаалах өдрийг тохиолдуулан олон хүүхэд төрүүлж өсгөсөн ээжүүдэд “Алдарт эх” нэг болон хоёрдугаар зэргийн одон гардууллаа. Энэ нь Монгол Улсын Үндсэн хууль болон “Олон хүүхэд төрүүлж өсгөсөн эхийг урамшуулах тухай” хуулийн хүрээнд гаргасан Ерөнхийлөгчийн зарлигийн дагуу хэрэгжсэн байна.
2025 онд улсын хэмжээнд нийт 14,480 ээж тус одонг хүртэх бөгөөд өнөөдөр одонгоо гардсан ээжүүдийн олонх нь 34-39 насны байжээ. Хамгийн залуу Алдарт эх 22 настай байгааг мэдээллээ.
Төрийн тэргүүн хэлэхдээ, “Алдарт эх” одон бол ээж хүний золиос, хичээл зүтгэлийг үнэлсэн төрийн дээд талархлын илэрхийлэл хэмээгээд, тэдний үр хүүхдийн төлөөх хичээл зүтгэлийг онцлон талархал илэрхийлэв. Мөн тэрээр “Хүүхдийн мөнгө” бол зүгээр нэг халамж бус, хүн амын өсөлтийг дэмжсэн бодлогын илэрхийлэл гэж үздэгээ хэлсэн байна.
Цаашид “Алдарт эх”-ийн одонд дагалддаг мөнгөн урамшууллыг 2025 оноос хоёр дахин нэмэгдүүлэн олгох шийдвэрийг Ерөнхийлөгчийн санаачилгаар хэрэгжүүлэх болсныг албан ёсоор мэдэгдлээ.
Энэ үеэр Ерөнхийлөгч нийт ээжүүдэд болон тэдний гэр бүлд эрүүл энх, аз жаргал, сайн сайхныг хүсэн ерөөсөн юм.
Эх сурвалж: Монгол Улсын Ерөнхийлөгчийн Тамгын газар
