2025 оны тавдугаар сарын 21-ний өдөр Дархан-Уул аймгийн “Оюуны-Ирээдүй” сургуулийн өргөтгөлийн барилгын талбайд ашиглаж байсан кран унаж, ойролцоох авто болон явган хүний хөдөлгөөнд саад учруулсан хэрэг гарчээ. Азаар тухайн үед явган болон дугуйн замаар хүн зорчиж байгаагүй, мөн автомашин яваагүй тул хүний амь, эрүүл мэндэд хохирол учраагүй байна.

Одоогоор холбогдох мэргэжлийн байгууллагууд газар дээр нь ажиллаж, нөхцөл байдлыг судлан, шаардлагатай арга хэмжээг авч эхэлжээ. Уг тохиолдол нь барилгын талбайн аюулгүй ажиллагааг хангах шаардлагын бодит жишээ болж байгаа бөгөөд хөдөлмөрийн аюулгүй байдлыг хангах, техник тоног төхөөрөмжийн бүрэн бүтэн байдал, ажилчдын чадвар, хариуцлагыг өндөр түвшинд сахих нь зайлшгүй чухлыг харуулж байна.

Эх сурвалж: Дархан-Уул аймгийн Онцгой байдлын газар