Дэлхийн олон оронд 1961 оноос хойш уламжлал болгон зохион байгуулж ирсэн “Алтан хайч” хонь ноослох олон улсын тэмцээн анх удаа Монгол Улсад зохион байгуулагдах гэж байна. Энэхүү тэмцээнийг мал аж ахуйн үйлдвэрлэлд дэвшилтэт техник, технологи, тоног төхөөрөмж нэвтрүүлэх, түүхий эдийн бэлтгэлийн чанар, стандартын түвшинг ахиулах зорилготой хэмээн тодорхойлжээ.

“Алтан хайч-2025” нэртэйгээр зохион байгуулагдах тус арга хэмжээ Монгол Улсын Ерөнхийлөгч У.Хүрэлсүхийн ивээл дор явагдах бөгөөд Хүнс, хөдөө аж ахуй, хөнгөн үйлдвэрийн сайдын 2025 оны А/235 дугаар тушаалаар ажлын хэсэг байгуулагдан, бэлтгэл ажлаа хангаж эхлээд байна. Ажлын хэсэг анхны хурлаа хийж, тэмцээний зохион байгуулалт, хөтөлбөр, оролцогчдын бүртгэл зэрэг асуудлыг хэлэлцсэн бөгөөд 2025 оны зургаадугаар сарын 20, 21-ний өдрүүдэд тэмцээн албан ёсоор явагдахаар тогтоод байна.

Энэхүү тэмцээн нь зөвхөн ур чадварын уралдаан бус, ноос бэлтгэлийн чанарыг сайжруулах, олон улсын стандартыг нутагшуулах, малчид болон үйлдвэрлэгчдийн хоорондын харилцаа холбоог бэхжүүлэх стратегийн ач холбогдолтой гэж салбарын яам үзэж байна.

Эх сурвалж: ХХААХҮЯ, Монгол Улсын Ерөнхийлөгчийн Тамгын газар