2025 оны тавдугаар сарын байдлаар улсын хэмжээнд 2112 удаагийн объектын гал түймэр, 89 удаагийн ой, хээрийн гал түймэр бүртгэгдээд байна. ОБЕГ-ын дарга, холбогдох албаныхан хэвлэлийн хурлаар гамшгийн эрсдэл, түүнээс сэргийлэх иргэдийн оролцооны чухлыг онцлон анхаарууллаа.

Объектын гал түймрийн ихэнх нь буюу 64.6 хувь нь иргэдийн санамсар болгоомжгүй үйлдлээс, 25 хувь нь цахилгаан хэрэглээний доголдлоос үүдэлтэй байжээ. Түймэр голчлон хувийн өмчид (76.5%) тохиолдож, нийслэлд нийт галын 67.1 хувь бүртгэгдсэн бол хөдөө орон нутгийн аймгуудаас Сэлэнгэ, Дархан-Уул, Орхон, Төв аймгуудад хамгийн их гал түймэр гарсан байна.

Ой, хээрийн түймэр өмнөх жилээс 31.4 хувиар өссөн нь анхаарал болгоомж сул байгаагийн илрэл юм. Түймрийн 30 хувь нь “маш их” эрсдэлтэй бүсэд, 60 хувь нь дунд эрсдэлтэй бүсэд гарсан байна.

Эдгээрээс сэргийлэх зорилгоор Онцгой байдлын ерөнхий газар сар бүрийн сүүлийн долоо хоногийн Пүрэв гарагийг “Аюулгүй байдлаа шалгах өдөр” болгон зарлаж, иргэн, байгууллага бүр өөрийн эрсдэлээ үнэлэх цахим хяналтын хуудсыг quiz.belenbai.mn сайтад байршуулсан байна.

Тус хяналтын хуудас нь:

• Байгууллагын гамшгийн бэлэн байдлыг шалгах

• Өрхийн “Аюулгүй өрх” үнэлгээ

• Иргэний гамшгаас хамгаалах мэдлэгийн түвшин тодорхойлох гэсэн гурван төрөлтэй бөгөөд эрсдэлээ таних, урьдчилан сэргийлэх мэдлэг, дадлыг сайжруулахад чухал ач холбогдолтой юм.

ОБЕГ-аас иргэн бүрийг өөрийн болоод орчныхоо аюулгүй байдлыг үнэлж, түүнд үндэслэн анхан шатны хамгаалалт, мэдлэгээ нэмэгдүүлэхийг уриаллаа.

Эх сурвалж: Онцгой байдлын ерөнхий газар