Монголын Эмнести Интернэшнл байгууллагаас Монгол Улс дахь хүний эрхийн төлөв байдлын талаар тайлан танилцууллаа.

Тайланд дурдсанаар, Монгол Улсад үзэл бодлоо илэрхийлэх эрх чөлөөг нухчин дарах, уул уурхайн үйл ажиллагаанаас үүдэлтэй байгаль орчны доройтол, малчдын эрх ашгийг хохироох явдал нэмэгдэж байгаа талаар онцолжээ. Мөн тэтгэврийн тогтолцооны шинэчлэлийн хүрээнд зарим ахмад настны тэтгэврийн хэмжээ буурсан зэрэг хүний эрхийн зөрчил байгааг тэмдэглэсэн байна.

Монголын Эмнести Интернэшнлийн судлаач И.Балжинням тайлангийн талаар ярихдаа,

“Тайланд олон нийтийн ял завшуулах, үзэл бодлоо илэрхийлэх, эрүүл орчинд амьдрах, нийгмийн хамгаалал, орон байртай байх, саатуулагдсан этгээдийн эрх зэрэг асуудлыг онцолсон. Манай улсад эдгээр эрхүүд ихээхэн зөрчигдөж байна.

Жишээ нь, нийслэлийн түгжрэлийг бууруулах, гэр хорооллыг орон сууцжуулах хуулийн хүрээнд 2023 онд 158 га газарт амьдарч байсан 2,000 гаруй өрхийг нүүлгэн шилжүүлэхдээ орон байртай байх, мэдээлэл авах, зөвшилцөх, шударгаар нөхөн олговор авах эрхийг нь зөрчсөн. Ийм үндэслэлээр бид төрийн байгууллага, бодлого боловсруулагчдад санал, зөвлөмж хүргүүлдэг” хэмээн мэдэгдэв.

Ташрамд дурдахад, Эмнести Интернэшнл нь 150 гаруй улсад 10 сая гаруй хүнийг эгнээндээ нэгтгэсэн, дэлхийд нэр хүндтэй хүний эрхийн хамгаалагч хөдөлгөөн бөгөөд Монгол Улсад 9,000 гаруй гишүүнтэйгээр хүний эрхийн боловсрол түгээх, хамгаалах чиглэлээр үйл ажиллагаа явуулж байна.

Эх сурвалж: Монголын Эмнести Интернэшнл