Олон улсын хөдөлмөрийн байгууллагаас жил бүрийн дөрөвдүгээр сарын 28-ны өдрийг “Үйлдвэрлэлийн ослын улмаас амь үрэгдсэн ажилчдын дурсгалыг хүндэтгэх өдөр” болгон зарлаж, 2003 оноос дэлхий даяар тэмдэглэж ирсэн уламжлалтай. Энэ жил уг өдрийг “Хөдөлмөрийн аюулгүй байдал, эрүүл мэндийн хөгжил: Хиймэл оюун ухааны хэрэглээ ба цахимжилт” уриан дор тэмдэглэн, нэг сарын аяныг орон даяар эхлүүлээд байна.

Өдрийг угтан дэлхийн улс орнууд үйлдвэрлэлийн ослоор амь үрэгдсэн ажилчдын гэгээн дурсгалыг хүндэтгэн лаа асаах, эрүүл аюулгүй ажлын байрны талаар ухуулга, сургалт, сурталчилгааны үйл ажиллагаа зохион байгуулж байгаа юм. Манай улс ч мөн 2012 оноос эхлэн жил бүрийн дөрөвдүгээр сарыг “Хөдөлмөрийн аюулгүй байдал, эрүүл ахуйн сарын аян” болгон зарлаж, ХАБЭА-н тухай хууль тогтоомжийг сурталчлах, үйлдвэрлэлийн осол, мэргэжлээс шалтгаалсан өвчнөөс урьдчилан сэргийлэх ажлуудыг тасралтгүй зохион байгуулсаар иржээ.

Монгол Улсад 2020-2024 онд нийт 2125 үйлдвэрлэлийн осол, хурц хордлогын тохиолдол бүртгэгдэж, 275 хүн амь насаа алдсан байна. Мөн мэргэжлээс шалтгаалсан өвчний улмаас хөдөлмөрийн чадвараа алдсан 2273 иргэн идэвхтэй хяналтад байгаа юм. Иймд хөдөлмөрийн аюулгүй байдал, эрүүл ахуй, үйлдвэрлэлийн осол, өвчнөөс урьдчилан сэргийлэх ажлыг салбар, орон нутгийн хэмжээнд улам эрчимжүүлэх шаардлагатай байгааг мэргэжилтнүүд онцолжээ.

Эх сурвалж: Хөдөлмөр, нийгмийн хамгааллын яам, Олон улсын хөдөлмөрийн байгууллага