Сургуулийн өмнөх боловсролын байгууллагын багш нарын гүйцэтгэлийн үнэлгээний шалгалт өнөөдрөөс орон даяар эхэлж байна. Үнэлгээний баг тухайн цэцэрлэгийн багшийн тооноос хамаарч эцэг эх, багш, аргазүйчээс бүрдсэн 3-11 хүний бүрэлдэхүүнтэй байх бөгөөд багийн гишүүд ажилчдын хурлаар 80-аас доошгүй хувийн санал авч сонгогдох юм. Харин үнэлгээнд нэг бүлгийн нийт хүүхдийн 30-аас доошгүй хувь, хөгжмийн болон биеийн тамирын багшийн сургалтын үйл ажиллагаанд хамрагдаж буй хүүхдийн 20-иос доошгүй хувь оролцох шаардлагатай.

Шалгуур үзүүлэлтэд:

• Хүүхдийг хөгжүүлэх, хамгаалах үйл ажиллагааны ахиц, үр дүн

• Багшийн мэргэжлийн хөгжлийн ахиц, үр дүн

• Цэцэрлэгийн болон нийтийн үйл ажиллагаанд оролцсон байдал, оруулсан хувь нэмэр зэрэг үзүүлэлтүүд багтжээ.

Боловсролын Үнэлгээний Төвийн Даалгаврын сангийн хэлтсийн дарга С.Гэндэнжамцын мэдээлснээр багшийн үнэлгээг суурь мэдээллийн санд баталгаажуулсан хүүхдийн тооноос түүвэрлэн авна. Хүүхдийн мэдлэг, чадварыг илрүүлэх ажиглалтын хуудас, асуулга, сорилын үр дүнг цуглуулж дүгнэлт гаргах бөгөөд хөгжмийн болон биеийн тамирын багш нарын үр дүнг салбар бүрээр тооцох аж. Энэ үнэлгээнд өндөр оноо авсан багш 40 хүртэлх хувийн цалингийн урамшуулал авах боломжтой юм байна.

Гүйцэтгэлийн үнэлгээний шалгалт тавдугаар сарын 3-ны өдөр хүртэл үргэлжилнэ.

Эх сурвалж: Боловсролын Үнэлгээний Төв