Нийслэлийн Засаг дарга бөгөөд Улаанбаатар хотын захирагч Х.Нямбаатар өнөөдөр Баянбүрдийн тойргийн орчимд ажиллах үеэрээ БНХАУ-ын хөрөнгө оруулалтаар баригдаж буй 1008 айлын орон сууцыг ирэх зургадугаар сард улсын комисст хүлээлгэн өгсний дараа борлуулж, гэр хорооллын газрыг худалдан авах ажлыг эхлүүлнэ гэдгээ мэдэгдлээ.
Уг ажлын хүрээнд Сүхбаатар дүүргийн 9-р хороо, Баянбүрдээс 32-ын тойрог хүртэлх зам дагуух хоёрдогч түүхий эд худалдан авдаг, дугуй засвар, тос тосолгоо хийдэг цэгүүдийг чөлөөлжээ. Тэрбээр “Төв талбайгаас нэг км дотор хог хаягдал, тос асгадаг газрууд байж таарахгүй. Энэ бол Улаанбаатар хотын төлөвлөлт биш” хэмээн онцлов.
Хотын даргын тайлбарласнаар, чөлөөлсөн газрыг инженерийн шугам сүлжээтэй нь хамт барилгын компаниудад санал болгож, орон сууцны 15–20 хувийг газрын нөхөн төлбөрт нийслэлд өгөх хэлцлээр зохион байгуулна. Ийнхүү нийслэл Нийслэлийн орон сууцны корпорациар (НОСК) дамжуулан эдгээр байрыг борлуулж, гэр хорооллын газрыг худалдан авах зориулалттай сан бүрдүүлнэ.
“Хашаандаа сайхан амьдаръя” уриа нь бодит амьдралд нийцэхгүй болсныг дурдсан Х.Нямбаатар, “гал түлж, хөрс бохирдуулахгүй, төвлөрсөн инженерийн шийдэл бүхий орчинд амьдрах нөхцөлийг бүрдүүлэхэд бидний зорилго чиглэж байна” гэв.
Эх сурвалж: НЗДТГ
