Монгол Улсын гаалийн байгууллага 2025 оны эхний улиралд шинэ төрлийн хар тамхи, мансууруулах бодисыг улсын хилээр хууль бусаар нэвтрүүлэхийг завдсан долоон удаагийн үйлдлийг илрүүлж, шуурхай таслан зогсоожээ.
Тодруулбал, 2025 оны 3 дугаар сарын 17-ны өдөр улс хоорондын шуудан илгээмжийн гаалийн хяналтын бүсэд хийсэн рентген шалгалтаар Германаас ирсэн илгээмж дотор цай, савангийн хайрцагт нуун далдалсан 840 грамм “Хашиш” нэртэй мансууруулах бодис илэрсэн байна. Илгээмж нь Монгол Улсын иргэн Г.Т-ийн нэр дээр ирсэн байжээ.
Илэрсэн хашиш бодис нь ойролцоогоор 3360 хүний нэг удаагийн хэрэглээнд хүрэлцэх хэмжээтэй байсныг гаалийн албаныхан онцолж байгаа юм. Уг зөрчлийг харьяаллын дагуу Цагдаагийн байгууллагад шилжүүлэн шалгаж эхэлжээ.
Хар тамхи, мансууруулах бодисыг хилээр хууль бусаар нэвтрүүлэхийн тулд шуудангийн илгээмж ашиглах, тээврийн болон аяллын хэлбэрт нуун авчрах зэрэг хэрэг гарах нь нэмэгдэх хандлагатай байгаа тул гадаад оронд зорчихдоо бусдаас дайвар ачаа авахгүй байх, хувийн мэдээллээ өгөхгүй байхыг албаныхан анхааруулж байна.
Энэ нь зөвхөн хувь хүний төдийгүй гэр бүл, ойр дотнын хүмүүсийн амьдралд ноцтой эрсдэл учруулж болзошгүй гэдгийг сануулж байна.
Эх сурвалж: Гаалийн ерөнхий газар.
