Улсын Их Хурлын даргын 99 дүгээр захирамжаар байгуулагдсан “Иргэний шаардлагад нийцсэн орон байртай байх эрхийг хангах хүрээнд хот дахин төлөвлөлттэй холбоотой хууль, эрх зүйн орчныг судлан санал, дүгнэлт гаргах, шаардлагатай бол холбогдох хуулийн төсөл боловсруулах” үүрэг бүхий ажлын хэсгийн хуралдаан 2025 оны дөрөвдүгээр сарын 10-нд боллоо.
Ажлын хэсгийг УИХ-ын гишүүн С.Эрдэнэболд ахалж байгаа бөгөөд хуралдаанд УИХ-ын гишүүд С.Ганбаатар, Б.Жаргалан, Г.Лувсанжамц, П.Мөнхтулга, Ц.Мөнхтуяа болон Хот байгуулалт, барилга, орон сууцжуулалтын яам, Нийслэлийн ЗДТГ, Хүний эрхийн үндэсний комисс, бусад холбогдох байгууллагуудын төлөөлөл оролцов.
НЗД-ын эдийн засгийн хөгжил, дэд бүтцийн асуудал хариуцсан нэгдүгээр орлогч Т.Даваадалай нийслэлийн хэмжээнд ашиглалтын шаардлага хангахгүй 5551 орон сууц байгаа талаар мэдээлж, тэдгээрээс 672 нь газар хөдлөлтөд тэсвэргүй, 385 нь ашиглахыг хориглосон шийдвэртэй, 178 нь дахин барилгажуулах захирамжтай байгааг онцоллоо. Мөн гэр хорооллыг дахин төлөвлөн барилгажуулах чиглэлд 16 байршил, 39 хэсэгчилсэн талбайд 36 төсөл хэрэгжиж байгааг танилцуулав.
Хуралдаанаар хууль, эрх зүйн орчны практик хэрэглээнд гарч буй бэрхшээлүүдийг хөндөн хэлэлцэж, цаашид талуудын оролцоог тэгш хангах өргөтгөсөн хэлэлцүүлэг зохион байгуулахаар тогтлоо.
Эх сурвалж: Улсын Их Хурлын Хэвлэл мэдээллийн алба
