2025 оны гуравдугаар сарын 22-нд цахим орчинд “Ачилтын компанийн ажилчид бусдыг хэл амаар доромжилсон” гэх агуулгатай бичлэг нийтлэгдсэнтэй холбогдуулан Цагдаагийн байгууллагаас зөрчил шалган шийдвэрлэх ажиллагаа явуулжээ.
Уг бичлэгт гарсан үйл явдалд холбогдсон иргэн “Т” нь хэрүүл маргаан үүсгэж, олон нийтийн газар бусдыг үл хүндэтгэсэн, танхайрсан үйлдэл гаргасан болох нь тогтоогдсон тул хэргийг харьяа дүүргийн анхан шатны шүүхэд шилжүүлсэн байна. Шүүхээс 2025 оны дөрөвдүгээр сарын 4-ний өдөр Зөрчлийн тухай хуулийн 5.2 дугаар зүйлд заасны дагуу иргэн “Т”-д 100 нэгжтэй тэнцэх хэмжээний торгууль оногдуулан шийдвэрлэжээ.
Цагдаагийн Ерөнхий газрын Хэвлэл, мэдээллийн төвөөс иргэдэд хандан, Замын хөдөлгөөний дүрмийг чанд мөрдөж, тээврийн хэрэгслийг зорчих хэсэг, явган хүний гарц, замын тэмдэг, тэмдэглэгээг зөрчин зогсоохгүй байхыг, мөн бусдын хөдөлгөөнд саад учруулахгүй байхыг анхаарууллаа.
Эх сурвалж: Цагдаагийн Ерөнхий Газрын Хэвлэл, Мэдээллийн Төв.
