Улаанбаатар хотыг хөгжүүлэх 24 мега төслийн нэг болох дүүжин замын тээврийн нэгдүгээр шугамын барилгын ажил үргэлжилж байгаа бөгөөд Туул голын ай сав орчмын зургаан баганын суурийг усны урсац болон шар усны үерээс өмнө барьж дуусгахаар ажиллаж байна.

Тус төслийн хүрээнд нийт 19 тулгуур багана босгохоор төлөвлөсөн бөгөөд энэ нь хотын хөдөлгөөний хэт төвлөрлийг бууруулах, авто замын түгжрэлийг багасгах, хотын нийтийн тээврийн хүртээмжийг нэмэгдүүлэх стратегийн чухал алхам юм. Төслийн хоёрдугаар шугам нь Шангри-Ла зочид буудлаас Үндэсний цэцэрлэгт хүрээлэн хүртэл нийт 2.7 км урт, гурван зогсоол, 70-74 кабинтай байх бөгөөд хотын төвийн бүс рүү чиглэсэн ачааллыг бууруулахад чухал нөлөө үзүүлнэ.

Дүүжин замын техникийн үзүүлэлтүүдийг дурдвал:

• Нэг кабин нь 10 зорчигч тээвэрлэх хүчин чадалтай

• Аяллын нийт хугацаа: 11 минут

• Тулгуур баганын өндөр: 7.5-42 метр

• Хөдөлгөөний хурд: 21 км/цаг

Энэхүү тээврийн шинэ төрлийг нэвтрүүлснээр Яармаг, Нисэхийн чиглэлийн түгжрэлийг бодитой бууруулах, замын хөдөлгөөний дундаж хурдыг 4 хувиар нэмэгдүүлэх тооцоо гарсан байна. Төслийн ажлыг НЗДТГ-ын Хэвлэл мэдээлэл, олон нийттэй харилцах хэлтэс хянан мэдээлж байгаа юм.

Эх сурвалж: НЗДТГ-ын ХМОНХХ