Урин дулаан цаг ирж, сурагчдын амралт эхэлсэнтэй холбоотойгоор хүүхэд багачуудын нохойд хазуулах тохиолдол эрс нэмэгдэх хандлагатай байгаа талаар мэргэжлийн байгууллагууд анхааруулж байна. 2024 оны байдлаар улсын хэмжээнд нийт 4610 хүн нохойд хазуулж гэмтсэн бөгөөд 77.2 хувь буюу 3558 тохиолдол нь зөвхөн нийслэлд бүртгэгджээ. Тэдгээрийн дийлэнх нь хүүхэд багачууд байгаа нь санаа зовоох асуудал болоод байна.

Хазуулсан хүмүүсийн 46.4 хувь (1651) нь 0-19 насны хүүхэд бөгөөд тэр дундаа 5-9 насныхан хамгийн өндөр эрсдэлтэй бүлэгт багтжээ. Иймд эцэг эх, асран хамгаалагчид болон нохой тэжээгчид дараах зөвлөмжийг анхаарах шаардлагатайг Гэмтэл Согог Судлалын Үндэсний Төвөөс мэдээллээ.

Хүүхдүүдэд өгөх зөвлөмж:

• Нохойны хүзүү, сүүлнээс татаж тоглохгүй байх

• Уяатай болон эзэнгүй нохойд хүрэхгүй байх

• Гудамж, талбайд болгоомжтой явах

• Нохойтой айлд орохдоо уяатай эсэхийг лавлах

• Нохойтой тааралдвал тайван, дөлгөөн байх, зугтаж гүйхгүй байх

• Хоолоо идэж байгаа, унтаж байгаа нохойг оролдохгүй байх

Нохой тэжээгчдэд хандсан анхааруулга:

• Хашааныхаа нохдыг уяж, гадуур сул тавьж болохгүй

• Гадуур нохойтой явахдаа хошуувч, хүзүүвч хийж, хөтөлж явах

• Бага насны хүүхдийг нохойтой хамт үлдээхгүй байх

Хэрэв нохойд хазуулсан бол:

• Яаралтай эмнэлэгт хандаж, вакцинд хамрагдах

• Шархнаас цус гарвал цэвэр даавуугаар шахаж боох

• Шархыг тогтмол цэвэрлэж, ариун боолтоор боох

Энэхүү эрсдэлийг бууруулахын тулд эцэг эх, багш сурган хүмүүжүүлэгчид, оршин суугчид хамтдаа анхаарал хандуулж, хүүхдүүдээ зөв дадалд сургах нь чухал байна.

Эх сурвалж: Гэмтэл Согог Судлалын Үндэсний Төв