Хэнтий аймгийн Политехник коллежийн 11 оюутан 2025 оны “Оюутан цэрэг” хөтөлбөрт хамрагдахаар шалгарч, цэргийн алба хаах эрхээ гардан авлаа. Тэднийг эрүүл мэнд, бие бялдрын шалгуур үзүүлэлтээр тэнцсэн залуусаас сонгон шалгаруулсан бөгөөд аймгийн удирдлагууд хүлээн авч уулзан, цэргийн үүрэгтний үнэмлэх, сурах бичиг гардуулсан юм. Шалгаруулалтад нийт 14 залуу оролцож, 11 нь тэнцэн цэргийн бэлтгэлд хамрагдах болсондоо баяртай байгаагаа илэрхийлжээ.

Тус хөтөлбөрийг Монгол Улсад 2014 оноос хэрэгжүүлж эхэлсэн бол Хэнтий аймагт 2023 оноос хэрэгжиж байна. Аймгийн хувьд их, дээд сургууль байхгүй ч Политехник коллежид суралцагчид энэхүү хөтөлбөрт идэвхтэй оролцож буй нь залуусын эх оронч үзлийг төлөвшүүлэхэд чухал нөлөөтэй гэж орон нутгийн удирдлагууд онцолж байлаа.

Аймгийн Засаг даргын Тамгын газраас хөтөлбөрийг дэмжиж, коллеж дээр “Оюутан цэрэг”-ийн зориулалтын танхимыг “Дайчин алдрын” булангийн хамт байгуулж, нийт 6 сая төгрөгийн санхүүжилт шийдвэрлэсэн байна.

Оюутан цэрэгт хамрагдах үйл явц дараах дарааллаар явагддаг:

• Эрүүл мэндийн үзлэг, эмчийн дүгнэлт

• Бие бялдрын шалгалт: 100 болон 3000 метрийн гүйлт, суниалт, гэдэсний таталт

• Шалгаруулалтад тэнцсэн оюутнуудад цэргийн алба хаах боломжийг олгох

Цэргийн сургалтыг хоёр үе шаттайгаар зохион байгуулах бөгөөд:

1. Цэргийн ерөнхий бэлтгэл сургалт

   • 2 багц, 96 цаг

   • 2025 оны 4 дүгээр сарын 5-наас эхлэн 2 сарын хугацаанд

   • Бямба, ням гараг бүрт 6 цагаар орно

   • Политехник коллеж дээр явагдана

2. Цэргийн мэргэжлийн бэлтгэл сургалт

   • 14 багц, 560 цаг

   • 6 дугаар сараас эхлэн 2 сарын хугацаанд

   • Зэвсэгт хүчний 327 дугаар ангийн сургалт-амралтын баазад явагдана

Хөтөлбөрт хамрагдаж буй залуус цэрэгжилтийн хичээлд суралцахаас гадна хамтын ажиллагаа, сахилга бат, эх оронч үзэл, хувь хүний төлөвшил, нийгмийн хариуцлагыг зэрэгцүүлэн эзэмших боломжтой болж байгаад сэтгэл хангалуун байгаагаа илэрхийлжээ.

Цаашид ч аймгийн залуусын дунд эх оронч үзэл, төрийн албанд зүтгэх хүсэл тэмүүллийг дэмжихэд энэхүү хөтөлбөр томоохон нөлөө үзүүлнэ хэмээн орон нутгийн удирдлагууд итгэж байна.

Эх сурвалж: Хэнтий аймгийн ЗДТГ, Политехник коллеж.