Баянгол дүүргийн Засаг даргын 2024 оны А/121 дүгээр захирамжаар иргэн А-гийн газар эзэмших эрхийг “усны онцгой хамгаалалттай бүс, үерийн далангийн хамгаалалтын бүс, цахилгаан шугам, Сэлбэ, Дунд голын байгалийн нөөц газартай давхацсан” гэх үндэслэлээр хүчингүй болгосон байна. Харин иргэн А нь “2013 онд хууль ёсоор авсан газрыг 5 жилийн хугацаанд хүчингүй болгоогүй бол эрх хэвээрээ” хэмээн маргаж, шүүхэд ханджээ.

Энэ талаар:

• Анхан шатны шүүх нэхэмжлэлийг хангасан. Учир нь захиргааны байгууллага хууль бус шийдвэрээ хүчингүй болгох 5 жилийн хугацааг хэтрүүлсэн гэж үзсэн.

• Давж заалдах шатны шүүх нийтийн ашиг сонирхолд нийцсэн хэмээн үзэж нэхэмжлэлийг хэрэгсэхгүй болгосон.

• Хяналтын шатны шүүх дээрх захирамжийг түдгэлзүүлж, нөхцөл байдлыг тодруулан шинэ шийдвэр гаргах үүргийг захиргаанд даалгасан байна.

Шүүхийн дүгнэлтээр:

• Усны онцгой хамгаалалтын бүсэд барилга байгууламж барих, аж ахуйн үйл ажиллагаа явуулахыг хориглодог.

• Иргэн А-ийн газар энэхүү бүстэй хувь хэмжээний давхацалтай байж болзошгүй тул зөвхөн тэр хэсэгт эзэмших эрх нь хүчин төгөлдөр бус байх үндэстэй.

• Давхацлаас үлдэх хэсгийг тодорхойлон, боломжтой бол үргэлжлүүлэн эзэмшүүлэх эсэхийг захиргааны байгууллага судлан шийдэх үүрэгтэй.

• Захиргаа нь шууд хүчингүй болгохоос илүү эрхийг хамгийн багаар хөндөх арга замыг судалж, боломжит хувилбарыг сонгох шаардлагатай гэж үзжээ.

Энэ нь иргэн, төр хоёрын эрх ашгийн тэнцвэрийг хангах, эрх зүйн тодорхой байдлыг хангах нэгэн жишиг тохиолдол болж байна.

Эх сурвалж: Улсын Дээд шүүх