Онцгой байдлын ерөнхий газрын Шинжлэх ухаан, технологийн зөвлөл болон Гамшиг судлалын үндэсний хүрээлэнгийн эрдэмтэн судлаачид 2024 онд Улаанбаатар хотын гэр хорооллын авто зам, гудамж талбайн эмзэг байдлыг судалж, гамшгаас хамгаалах үйл ажиллагаанд чухал мэдээлэл бүхий үр дүнг танилцуулжээ.

Судалгаанд дурдсанаар нийслэлийн нийт 180 мянга гаруй өрх гэр хороололд амьдарч байгаа бөгөөд гэр хорооллын нийт талбай 232.06 км² байна. Энэ бүсэд ашиглагдаж буй авто зам, гудамжны сүлжээний 10 хувь буюу 20 орчим км² нь хаалттай, том оврын аврах, гал унтраах тусгай зориулалтын автомашин нэвтрэх боломжгүй, хаягжилт хангалтгүй, үерийн усанд өртөмтгий зэрэг эрсдэл бүхий байршилд оршиж буйг судлаачид тогтоожээ.

Нийслэлийн зургаан дүүргийн хэмжээнд хийсэн үнэлгээгээр:

• Машин очих боломжгүй мухар гудамж

• Үерийн ам болон үерт автах магадлалтай байрлал

• Өндөр хүчдэлийн дор буусан өрхүүд

• Автомашин эргэх боломжгүй нарийн гудамж

• Үерийн даланд байрласан болон зам хааж, хашаа сунгасан байршил

• Өндөрлөг газарт буусан гэр хорооллын хэсгүүд

гэсэн шалтгаануудаар нийт 396 байршил-ыг өндөр эрсдэлтэй гэж тодорхойлсон байна.

Энэхүү судалгаа нь нийслэлийн онцгой байдлын байгууллагуудын гамшгийн эрсдэлийг бууруулах төлөвлөлт, түргэн шуурхай аврах ажиллагааг оновчтой зохион байгуулах, замын сүлжээний сайжруулалтад суурь мэдээлэл болох юм.

Эх сурвалж: ОБЕГ, Гамшиг судлалын үндэсний хүрээлэн.