Цахим орчин, тэр дундаа фэйсбүүк сүлжээгээр их хэмжээний зээл олгоно гэсэн зарын дагуу иргэд холбогдож, үйлчилгээний хураамж, урьдчилгаа төлбөр нэрийдлээр мөнгөө шилжүүлж залилуулж байна. Тухайлбал, Сонгинохайрхан дүүрэгт өнгөрсөн гурван хоногт энэ төрлийн хоёр гомдол бүртгэгджээ.

Нэг тохиолдолд иргэн М нь “буцалтгүй тусламжаар 50 сая төгрөг олгоно” гэсэн фэйсбүүк зарын дагуу холбогдож, үйлчилгээний хураамж нэрээр 990,000 төгрөг шилжүүлсэн бол нөгөө тохиолдолд иргэн Б “зээл гаргана” гэсэн мэдээлэлд хууртаж, зээлийн дүнгийн 10 хувь буюу 4,800,000 төгрөгийг шилжүүлэн залилуулсан байна.

Түүнчлэн залилагчид гадаад улсаас өв залгамжлал, эсвэл бага хүүтэй зээл санал болгох байдлаар иргэдийг хуурч, цахим төлбөрийн хэрэгслээр мөнгө шилжүүлүүлэх зохиомол байдал үүсгэж байгаа юм.

Цагдаагийн байгууллагаас анхааруулахдаа:

• Хуурамч мэдээлэл нь иргэдийн хэрэгцээ шаардлагад яг тохирсон, зах зээлийн дундаж нөхцөлөөс хавьгүй хямд, амархан санагдаж буй байдлыг ашиглаж байна.

• Хэрэглэгчийн хувийн фейсбүүк хуудсаар дамжуулан найз нөхдийн нэрийг барьж холбоо тогтоодог.

• Аппликейшн ашиглан залилан хийх хэлбэр нэмэгдэж байна гэжээ.

Иймд иргэд цахим орчинд болгоомжтой байж, танихгүй хаягаас ирсэн “амархан мөнгө олох” саналд хууртахгүй байх, ямар нэг хураамж төлөхөөс өмнө тухайн байгууллагын албан ёсны эх сурвалжийг шалгахыг цагдаагийн байгууллагаас уриалж байна.

Эх сурвалж: Цагдаагийн Ерөнхий газар.